«Никабрал хIакъираву бяст-ччаллийсса гъалгъарду хъанай бур, аьратталшиву, куннан кув къабувчIавуртту дур. Гьаз хьусса авазалул утти ми лархсса душваврах хъиннура къулагъас дуллалисса кIану хьуну бур», – укун тIий баян бунни исламрал элмулул доктортурал группалул къулбасру дусса хIукмулий.
Ва хIукмулия бувсун бур Дагъусттаннал Муфтиятрал телеграм-каналданий. ХIукмулуву кIицI лавгун бур, мукьрагу мазгьабрал аьлимтурал никабрал хIакъираву личIи-личIисса пикрирду бушиву, цалийн бувкIсса кIану бакъашиву. МуницIухва чIявуми аьлимтал-правоведтал, шариаьтрай никаб лаххансса тIалавшинна дакъассар тIий бур.
«Агарда хьхьичIва шариаьтрайн бувну никаб лаххаву чара бакъашивуну диркIхьурча, хIакьину мунихсса бургаву даххана хьуну дур, цаппара билаятирттай никаб динийсса радикализмалул ва фанатизмалул лишан хьуну дур. Мунияту, вай ишругу хIисавравун лавсун, динчитал — аьлимтал ва динийсса бакIчитал бур никаб лаххаврия махъаллил хьун маслихIат буллай, агьалинан нигьачIисса тагьар душивугу хIисавравун лавсун», – укун бувчIин буллай бур Республикалул Муфтият.
ХIукмулуву кIицI лавгун бур, никабрал кIанттай лачак ягу веер ишла дуван хъанай бушиву, мукунсса чарабакъашиву духьурча.
ДакIнин бутанну, июль зурул 3-нний Дагъусттаннал Муфтиятрал никабирттай чIумуйну къадагъа дуллалишиву баян бувшиву.
