Вай гьантрай 90 шинал юбилей кIицI лаглай ур навтлил ва газрал отраслилуву биялсса опыт ва куртIсса кIулшивуртту дусса, чIярусса шиннардий Дагъусттаннал «Дагбургеотермия», «Бургазгеотерм» ДАО-лул управлениялул хъунаманал къуллугърай зий ивкIсса, газрал промышленностьрал лайкь хьусса зузала, ХIажинал арс АхIмад Кьадиров. Бусравсса даражалийн ияннин АхIмадлул бивтун бур бигьа бакъасса ххуллу.

АхIмад увну ур 1934-ку шинал январьданул 15-нний Лакрал райондалийсса НицIавкIуллал шяраву. Оьрмулул 9 шинавусса оьрчI 1944-ку шинал шярава бизан баврил иширттал бара хьуну ур. Тай чIунну тачIавгу дакIния лаглай дакъар тIий буслай ур цувагу.
– Бачин бувну бивкIру 4-5 къатлун ца аьравагу дуллуну, бахьтта. Ганий ци буза бишинссия. Жул дия 2-3 зивулийсса къатри. КIивусса кьай-кьуйгу дуний кьариртун, бувкIссару. Гъумуча Щурагьун ияннин, щяикIансса кIану бакъа, аьравалттицIун лавчIун най уссияв. Шилун бувкIун мукьахгу, арнил кIанттай вардиш бакъа­сса инсантал, баргъ лачIлай, малярия, дизентерия дирну, литIлай бавчуна. Жу ца ниттил канихун багьсса 3 ятин бивкIру. Шаймур дуллай, ниттищал колхозрал давурттайн занай бикIайссияв. Та заманнул оьрчIан кунма, жунгу мюрщинийва захIматрал кьадру кIул хьуссар.

Вайннал кулпат шярава бизан бувну нанисса чIумал, ппу Бабаюртуллал райондалийсса къутаннайн командировкалий гьан увну ивкIун ур. Махъунай зана хьуну, Хасаврайн ивсса чIумал, гиччава увцуну, армиялийн гьан увну ур. Тания шийнай ппу ятIа-тIар бакъа акъа хьуну ур.
Нину, РахIимат, колхозраву зий диркIун дур. Кулпатраву ивкIун ур 3 арс. АхIмад хъунама ивкIун ур. Тай захIматсса шиннардий ниттища бювхъуну бур 3-гу арс ххаллилсса тарбиягу дуллуну, дуккингу бувну, чивун буккан бан.

АхIмадлул 10 класс къуртал бувну бур ЦIуссалакрал райондалийсса ЦIуссалакрал шяраву­сса школа-интернатрай. Ши­кку дуклакисса чIумал учительтал бивкIун бур техникалул элмурдал чулухунай итххявхсса жагьилнахь физика ва математика куртIну лахьхьайсса вузирдавун уххан­сса маслихIат буллай. АхIмадлул тIурча, язи бувгьуну бур Навтлил ва газрал мяъданнал ахттаршиннардал вуз. Та ппурттуву сийлий диркIун дур навтлил ва газрал промышленностьрал давуртту.
АхIмадлул 1957-ку шинал Грозный шагьрулий М.Д. Миллионщиковлул цIанийсса Навтлил институтраву лархьхьуну дур инженернал касму. Жагьил­сса пишакар гьан увну ур Избербаш шагьрулийсса навтлил ахттаршиннарду дайсса конторалий инженерну зун. Шичча байбивхьуну бур ванал захIматрал ххуллугу. Ца шинай зий ивкIун ур бурильщикнал кумагчину, яла бурильщикну, буровой мастерну, 1961-ку шиная — парторганизациялул тархъансса секретарьну. Бурильщикну зузисса чIумал ванан хъунмасса кумаг хьуну бур мяъданнал ахтаршиннардал даврил хIалкьазия лахьхьинсса.

АхIмад оьрмулухун барчаллагьрай ур, та чIумал конторалул директорну ивкIсса, гьунар бу­сса инженер, ххаллилсса лаккучу (аьпа баннав цал) Ибрагьим Гунашевлуйн.
– Институт къуртал був­сса жагьилсса пишакартуравух гьан увссара Избербаш шагьрулий­сса бурениялул технический отделданул инженерну. Гунашевлул, ттухгу урувгун, увкуна: «Вин конторалуву щяикIан пайда ба­къассар, отраслилул пишарду лахьхьиншиврул, бурильщикну зун аьркинссара», – куну. Танал насихIатру ттун оьрмулул мяъна-мурадну хьуссар.

Навтлил мяъданну ахттар буллалисса 1962-1964 шиннардий, ванал каялувшиннаралу тIивтIуну дур Ачи-Сулийсса ва Шамхал-Булакрайсса газрал месторожденияртту, Къаякантуллал райондалийсса Гаша тIисса шяраваллия арх бакъасса зунттуй навтлил фонтан. Шиккусса давуртту къуртал дайхту, АхIмадлуйн вихшала бувну бур бурениялул хъунама инженернал къуллугъ.
1970-ку шинал АхIмад тIалав увну ур Дагъусттаннал республикалий цIуну тIиртIусса Ухссавнил Ккавкказуллал Аьрщарава нани­сса гъилишиву ишла давриха ва бурениялуха зузисса промысловый управлениялул хъунама инженерну зун.
АхIмадлул бусаврийн бувну, та ппурттуву Къизляр шагьрулул хъунмур бутIа ва 1-мур МахIачкъалаливсса къатри гъили дуллай бивкIун бур аьрщарава нанисса, 105% кIиришиврул дусса геотермал щинай. Муни­цIун бавхIуну, тIабиаьтрал газ ва навт экономия хъанай бивкI­ссар ва агьалинангу коммунал хIаллихшиннардахсса багьа чIа­ланну чансса бивкIссар.

Совет Союзрал билаят лив­сса ппурттуву хъунмасса щавщи бивну бур навтлил ва газрал промышленностьрайн. Вайнналмур предприятиялул бакIрачIангу захIматсса кьинирду дуркIун дур. Шиннардил му­тталий ахттаршиннарду дурсса скважинартту лакьин багьну бур, дарцIуну дур сайки цинярда буровой давурттугу. Тай шиннардий АхIмадлуйн Американава ва цаймигу кIанттурдая оьвтIий бивкIун бур геотермиялул промышленностьраву зун.
Кьадировлуйн 1984-ку шинал вихшала бувну бур Дагъусттаннал «Дагбургеотермиялул» къуй дуккаву, Скважинарттал строительстварду даврил ва аьрщарава нанисса термал щин ишла даврил управлениялул хъунаманал къуллугъ. Ванал хIарачатрайну тIиртIуну дур Ставропольлал ва Краснодардал крайрайсса геотермиялул производствалул подразделенияртту. ЧIун наниссаксса кIантту-кIанттурдайгу тIиртIуну дур цивппа заллусса управленияртту. Цала даву куртIну кIулсса, опыт бусса каялувчинал щала оьрму хас бувну бур Дагъусттаннал навтлил промышленность ва Ухссавнил Ккавкказнавусса геотермал энергетика ишла даву хьхьичIуннай даврин.
«Дагбургеотермиялул» управлениялий каялувшиву дуллалисса хIаллай, тIиртIуну ва зузи дурну дур Къизлардал, Тернаирдал, Къаякантуллал, Терекли-Мектебуллал, Дагъусттаннал, Чаргаснал, Краснодардал крайрайсса ва геотермал щинал цаймигу месторожденияртту. Ва хъанай ур аьрщарава нанисса щинал гъилишиву инсантуран мюнпат буну ишла дуллай ивкIсса пишакартуравасса ца.

ХьхьичIунсса пишакар хIи­саврай, цимилгу гьуртту хьуну ур аьрщарава нанисса гъилишиву ишла даврин хас бувсса симпозиумирттай, конгрессирттай. Ва мяйжаннугу агьалинай дакI цIуцIисса, халкьуннал оьрмулул шартIру ххуй дансса чараннах луглагисса пишакар ивкIун ур.
АхIмад Кьадиров ур геотермал щинал энергетика ишла даврин хас дурсса 3 ахттаршиннарал, навтлил ва газрал скважинартту дуккаврил, термал щин, ишлагу дурну, махъуннай зана ритаврин хас дурсса, мюнпат бусса 20-хъайсса рационал предложениярттал автор. Ванал бартбивгьуцири иширттан бивщусса лахъа-хъунсса кьиматну хъанахъиссар вай цIарду: «Газрал промышленностьрал министерствалул отличник», «ДР-лул лайкь хьу­сса нефтяник», «Газрал промышленностьрал отличник», «Газрал промышленностьрал лайкь хьу­сса зузала». Студент шиннардийва лайкь хьуну ур «За отвагу» медальданун.
Ванал 1997-ку шинал цала къуллугъ тапшур бувну бур жагьилсса никирайн. Опыт бусса каялувчи ва тIалавшинна ду­сса насихIатчи АхIмад Кьадиров управлениялия гьан итансса чара къабивкIун бур. Пенсиялийн увккун махъгу ва «Геотермнефтегаз» управлениялул хъунама геологну ивтун ур.
ХIакьинугу тIалавну бур кIицI ларгсса отраслирдавусса ванал опыт. Кьадировлуйн оьвтIинма бур ДГПИ-рал навтлил ва газрал факультетрал студентътурахь лекцияртту ккалан. Ва рязину акъар вузирдавусса кIулшивуртту дулаврил даража лайкьсса куццуйсса бакъашиврия.
– Жул заманнай оьрчIру техникалул вузирдавун кIункIу тIун бикIайва. Ххуйсса стипендиягу бикIайва. КIулшивурттал кьимат бусса чIун дия. На дуклакисса чIумал гьарца курс къуртал байхту практикалий гьан байвав. Му дакъахьурчан, кIулшивуртту дулун захIматссар. ХIакьинусса институтирттаву танийсса техникумирттаву дулай­сса кIулшивуртту дуллай бакъар. Замана ци-бухьурчангу, гьарица инсан цува усса кIанай, цала къуллугъралгу, инсаншиврулгу бурж лажин кIялану бартбигьлай, халкьуннан мюнпатну зун аьркин­ссар, – тIий ур ва.

АхIмад Кьадировлул оьрмулул ва захIматрал биографиялия чивчуну бур «Лучшие люди» тIисса, агьалинал оьрмулуву хъунисса хьхьичIуннайшивуртту дурсса инсантураясса дунияллул халкьуннал энциклопедиялуву.
Хьуну дур АхIмадлул оьр­мулуву пашмансса кьинирдугу. Дунияллия лавгун бур 60-нния лирчу­сса шиннардий цачIу оьрму бутлай бивкIсса ванал кулпат ПатIимат. Ва Избербашлив гьан увсса ппурттуву, ПатIиматгу ласнащал бивкIун бур. МахIачкъалалив бувкIун махъ вагу 50-хъайсса шиннардий зий бивкIун бур Республикалул хъунмур азарханалул гастроэнтерологиялул отделениялул хъунмурну. Вайннал дянив хьуну бур 3 оьрчI. ЦIакьсса бур кулпатраву бивзсса тарбиялул гьану. ОьрчIаягу цала-цала давурттай бусравсса, ххаллилсса пишакартал хьуну бур. Ибрагьим зий ур ДР-лул ХIукуматрал Машлул ва промышленностьрал палаталуву. Наидая, ниттил пиша язи бувгьуну, хIакин хьуну бур. ЧIивима арс Камил Пенсионный фондрай зий ур. «Мировой дедушка» тIий, цIанихгу уллай, ишин-итан кIану бакъа, ххирасса ур АхIмад оьрчIал оьрчIангу.
Вай гьантрай АхIмад Кьадиров кIицI лаглай ур инсаншиврий, яхI-къириятрай бувтсса оьрмулул 90 шинал юбилей.
Барчагу уллай, чIа тIий буру хIурмат лавайсса АхIмад ХIа­жиевичлун цIуллушиву, оьрчIал ва миннал наслулул ххари уллай итаннав.
Имара Саидова