Октябрьданул 17-нний МахIачкъалалив «Аьрасат - ттул тарихри» тIисса паркраву хьунни «Дагъусттан: Тарих, культура, идентичнайшиву» тIисса луттирал презентация.

Ва меценат ва жяматийсса ишккакку, Аьрасатнал лачIун буккаврил спортрал федерациялул вице-президент, бизнесмен, Аьхьхьахъиял райондалиятусса МахIаммадлул арс Оьмар Муртузялиевлул ка кIидахIаврийну итабавкьусса лу бур, 520 лажиндарай республикалул тарихрая, оьрмулия 26 аьлим­чунал бувсун бур.
Луттирал дур оьрчIи-чIюлу­сса иллюстрациярттащалсса 28 раздел: тарихран, культуралун, археологиялун, этнографиялун, канил пагьмурдан хас дурсса. Халкьуннал шаэр Расул ХIамзатовлул «Зунттал халкь» тIисса лаизаву QR-кодрал кумаграйну 28 мазрай дуккин хъанай дур. ЛичIину бутIри хас бувну бур республикалул миллатирттан, литературалун, фольклорданун, театрдан, миллатирттал къавтIавурттан, архитектуралун. Гьаннайсса, ва лу кIунттил бувгьуминнан, Дагъусттан халкьуннал дуки-хIачIиялия тIайла хьуну, арцу-мусил чIюлушиннардайн бияннин лахьхьин тIий бур. Презентациялий гьуртту хьунни сенатор Илияс Оьмаханов, республикалул хIукуматрал хъунаманал хъиривчу Ризван ГъазимахIаммадов, Дагъусттаннал Халкьуннал Мажлисрал председатель Заур Аскандаров, идарарттал каялувчитал, культуралул вакилтал.
«Зувиннияр ххишаласса шиннардий ттун талихI хьунни вайннал ххувшавурттаву ва хьхьичIуннайшивурттаву чIиви-хъунсса бутIа бишин», – тIий, чичлай ур, спортсментурал хьхьичIуннайшивурттая буслай, Оьмар Муртузялиев хьхьичIмукъуву. Ванал жяматийсса иширттал давурттаву ца язимунин ккаллиссар «Чистое сердце» тIисса фонд. Яруссаннал театр бакьин, цIу буккан буван кумаг бувссар. Ванал бавтIсса 19-20-ку аьсрурдал живописьрал коллекция Ккавкказуллан ва Дагъусттаннан хас бувсса бур. Луттирал презентация хьун­тIий дур Москавлив вава зурул 23-нний. Шиккува кIицI лаган, меценатнал арснал сипталийну лу бувккун бур ингилис мазрай Лондоннайгу. Ва франциянал, немецнал, аьрабнал ва туркнал мазурдийнгу таржума буван тIий бур.
Лу сакин бувма ва шеф-редактор ур Николай Ильин.
Лажин хIадур дурссар ПатIимат Рамазановал