Сентябрьданул 14-нний Дагъусттаннал БакIчи Сергей Меликовлул каялувшиврий хьунни республикалий бувчIавурттайн хIадур шаврил хIакъиравусса батIаву.

Республикалул каялувчинал бувсунни региондалий муданнасса низамрай зий бушиву бувчIавурттайн хIадур шаврин хасъсса зузи группа, ванил дуллай бушиву бувчIавуртту лайкьсса даражалий сакин дувансса давуртту.
Сергей Меликовлул тIиму­нийну, сентябрьданул 16-нний бувчIавурттал иширттавух хIала-гьурттуну бикIан аьркинсса циняв властрал органну, идарартту, ми­кку зузисса къуллугъчитал хIадурну бикIан аьркинссар чIурду булавурттайн. Му кьини ххал бигьинтIий бур бувчIавурттал комиссияртту ва бувчIавурттал участокру чIурду булаврийн хIадурну бушиву. Дагъусттаннал БакIчинал тIимунийну, бувчIавуртту дуван аьркинссар тIиртIуну, аьчухну, закондалуцIун даркьуну. «Жунна аьркинссар щаллу дуван цалий дарцIусса, паракьатсса тагьар, инсантураща бю­хъаншиврул илкинсса даражалий булун цалва чIурду», — кунни субъектрал бакIчинал.