Волгоградуллал областьрая «Единая Россия» партиялущал цачIуну Дагъусттаннайн тIабиаьтрал апатIрайну зарал бивминнан бувкIунни гуманитар кумагращалсса ацIния мукьва хъунмасса фура.

Волгоградуллал областьрал губернатор Андрей Бочаровлул мукъурттийну учин, гуманитар кумаг хьуну бур жула хъунмасса билаятрал халкьуннал цашиву ва уссушиву ккаккан дуллалисса акцияну. Ттуршунния ливчусса инсантал хьхьу-кьини дакъа бувккун, лахъан дурну дур шанттуршуннийн дирсса тонна кумаграл – дукия, лаххия, даруртту ва стройматериаллу. Жула билаятрал халкьуннал уссушиву тасттикь дансса иш хьуну бур кумагращалсса фурарду Аьрасатнал аьралий савлугърал ца яла хьхьичIунмур кIанттун ккаллисса, бусалардаву ливчIсса Мамаев Кургандалия тIайла буккаву.

Шикку совет солдатнал виричушиврул ва чувшиврул лишанну хьусса бакIрай, хъачIрай хъачI дирхьуну, душманнащал талай бивкIссар жула билаятрал личIи-личIисса миллатирттал инсантал, чIявусса дагъусттанлувтуралгу жанну дуллуссар ва аьрщи мурахас дуллай.
«Хъуннасса агьамшиву дуссар жула ватанлувтурансса кумаг, гьамин, ва кIанттава – Сталинградуллахлусса талатаврил вирттаврансса гьайкалданул ухнила тIайла буклай бушиврул», – увкунни Бочаровлул.

КIицI лавгунни ва акциялул халкь цачIун буллай бушиву ца аьмсса мурадрал – кьини дуркний куннал чIарав кув бацIан.
ДакIнин бувтунни ларгсса шинал «Знамя Победы» автопробег дайдирхьуну диркIшиву шичча Мамаев Кургандалия. Таний автопробеграй гьуртту хъанахъиминнал бивтссар щала Аьрасат, Ххувшаврил Ттугъ Москавлийн Парадрайн биян банцIа.
Ва базилухь Волгоградуллал агьали дагъусттанлувтурал чIарав бавцIунни, цивппа чув ялапар хъанай бухьурчагу ватанлувтурал кумагран бучIан хIадурну бушиву ккаккан буллай.
Укунсса сиптардал исват буллай бур хъиншиврул ва кумаграл хIуччардай ялапар хъанахъисса Аьрасатнал жяматрал цашиву.

Зулайхат Тахакьаева