Автопробег сакин дурну дур Дагъусттаннал региондалийсса «Победа» тIисса, щалагу Аьрасатнал жяматийсса фондрал отделениялул ва «Союз офицеров Республики Дагестан» тIисса жяматийсса идаралул ДР-лул Экономикалул министерствалул чIарав бацIаврийну. Гьашину автопробег шамилчинни дуллалисса.
Автопробеграл гьурттучи, ДР-лул Экономикалул министерствалул экономикалул управлениялул хъунама МахIаммад-Шамил Буттаевлул бувсунни, гьуртту хьуми Дагъусттаннал личIи-личIисса районнайн бившиву. Шикку машинарттал колонна хьунадакьлай бивкIун бур кIантту-кIанттурдайсса администрациярттал вакилтал, патриот идарартту ва дуклаки оьрчIру.
– Бюхттулсса Ххувшаврин хас дурсса автопробег ларгунни лайкьсса даражалий. Жу хьунабакьлай бивкIсса жагьилтурал чIявусса суаллу буллай бия билаятрал тарихрая, Буттал кIанттул цIанийсса Хъунмасса дяъвилул цIараву къучагъшивуртту ккаккан дурсса вирттаврая. Ва автопробеграйну жува ялун нанисса никиран эбратну хьусса вирттал дакIнин бичлачиссару. Барчаллагь учин ччай ура гьуртту хьуцириннахь, – увкунни МахIаммад-Шамил Буттаевлул.
Автопробеграву гьуртту хьуминнахь барчаллагь тIисса ихтилатру бунни Аьрасатнал Виричу Загьид Загьидовлул ва «Победа» патриот фондрал каялувчи Ибрагьим Ибрагьимовлул.
– ХIакьину жува хьунабакьлай буру хъуннасса агьамшиву дусса патриот акциялул гьурттучитал. Вирттал дакIний битаву, жулва тарих кIулшиву жучIара мудангу кьадру-кьиматрай дикIан аьркинссар. Жунна тачIавгу хъамаритан къабучIиссар жулва буттахъал дурсса виричушивуртту, – увкунни Загьид Загьидовлул.
Хъирив гьурттучитурал Аьрасатнал Виричу МахIаммад НурбахIандов дакIнин утлай, Экономикалул министерствалул хIаятраву дирхьусса Виричунал гьайкалдануцI тIутIив дирхьунни.
