Хъаннил байрандалул кьини ЦIуссалакрал райондалул бакIчи МаматIи ХIамзатов ва ванал хъиривчув бивунни Аьрасатнал Виричув Исяев Мутай Закириновичлул нину Язимат АхIмадовачIан.
Вай гьантрай Язиматлун барт лаглай дур 84 шин. Бувсса кьинигу, Хъаннил байрангу барча дуллай, МаматIи ХIамзатовлул буллуна ванин тIутIал кацI, арцуйнусса бахшиш ва чIа увкуна цIакьсса цIуллушиву.
Райондалул бакIчинал Язиматлухь барчаллагь увкуна Виричувсса арс тарбия аврихлу.
ДакIнийн увтуна миллатрал къучагъсса арс Мутай Исяев.
1999 шинал хар-хавар бакъа ЦIуссалакрал райондалийн дунияллул террористътурал кьюкьри ххярхсса ппурттуву, нигь къакIулсса, къучагъсса Мутай Исяев къачагътурайн кьянкьану данди авцIуссар. Укунсса Вирттал жунма абадлий дакIний личIантIиссар.
