Баргълагавал хIукуматирттал Хъунмасса Бутттал кIанттул цIанийсса дяъвилул тарих баххана буллан кьаст лахIаврин багьанагу хьуссар, дайдихьугу дурссар тIиссара Совет Союз лирну махъ хIукуматрал лавсун нанисса ххуллу баххана шаву, идеологиягу дакъа-къатIа шаву.
Оьрмулул хъуниминнан ххуйну дакIнийссар цуксса къулагъас диркIссарив жула хIукуматрай ялун нанисса ник Ватан ххирану тарбия даврих, Хъунмасса Буттал кIанттул цIанийсса дяъвилул тарих лахьхьаврих. Школарттай, байбихьулул классирттая тIайла хьуну, хьхьичIххуттайн ларсъсса тема ва дикIайссия. Яла дарсирдал махъун агьлагьисса дуклаки оьрчIангума Хъунмасса Буттал кIанттул цIанийсса дяъвилиягу, дяъвилул вирттавраягу кIулссия.
Дуклаки оьрчIал дянивсса художествалул самодеятельностьрал бяст- ччаллай дяъвилиясса балайлух ва назмулух ххишаласса балл булайва жюрилул. Классрал кьатIувсса мероприятияртту чIяруми ва темалийсса дикIайва. Совет литературалул дарсирдай лахьхьайсса произведениярттавугу чIявусса бикIайва Хъунмасса Буттал кIанттул цIанийсса дяъвилиясса. Школалул сахIналий дуклаки оьрчIал ччя- ччяни бишайссия «Молодая гвардия», «Зоя Космодемьянская», «А зори здесь тихие» ва цаймигу дяъвилиясса произведениярттавасса парчри. Клубравун дяъвилиясса кино дучIарча, учительтал оьрчIащал лагайва му ххал дан.
Сисайссияв цучIав укунсса шартIирдай, укун кьадру-кьиматрай ябуллалисса жулва тарих баххана буллан. Циванни цIанасса школалул программарттай вай произведенияртту бакъасса. ХIакьинусса жагьилсса оьрчIан-душваран Зоя Космодемьянскаягу, Олег Кошевой ва Ульяна Громовагу ца буссарив кIулшиврийн щак тIий бура. Щак тIий бура хIакьинусса оьрчIан кIулшиврий Виричунал цIа ларсъсса шагьрурдал цIарду.
Мугу оьрчIайсса аьйну чIалай дакъар ттун. ЧIярусса шиннардий идеологиялул даву хьхьара дурксса жулла хIукуматрайсса тагьар, мутта бирияйхту, мугьлат бакъа ишла дунни хъап учин хIадурну бивкIсса баргълагавал билаятирттал. Къулайсса сант диривунни миннахьхьун къучагъсса тарих баххана бан. Мунин ххуллу кьукьин хIакьину хъунмасса бияла жухьва буссар. Совет халкьуннал геноцидрал хIакъираву суд-диван сукку бавугу Западрал планнан ххуллу кьукьинсса ца шартIри.
Умуд бур ва ца процессрайну къуртал къахьунссар тIисса.
