Январьданул 27-нний, Ленинград шагьру блокадалува буккан бувну 81 шин шаврин хасну, Лакрал райондалий хьунни митинг.
Ваний гьуртту хьунни администрациялул ва идарарттал зузалт, дуклаки оьрчIру, «Движение Первых» организациялул кIанттул отделениялул активистътал ва чIава аьралийтал.
Митинг тIитIлай, райондалул администрациялул бакIчинал хъиривчу Явсупи ХIамзаевлул бавтIминнан дакIнин бувтунни кIирахъул шиннардий лахъи ларгсса блокадалул захIматсса шартIирдава лахIан бан къавхьуну бувксса Ленинградуллал агьалинал виричувшиву ва чумартшиву щала дунияллун эбратну хьушиву.
– Жува бавтIун буру тархъаншиврухлу жанну дуллуми дакIнин бичин. Лахъисса чIумул мутталий блокадалул захIматсса шартIирдаву яхьун бювхъусса Ленинград шагьрулул агьалинал тарбия дурссар жувура гьарцаннаву ватандалухсса ччаву, 872 гьантлий лагма рургьусса шагьрулий, душман шагьрулувун уххан итаяр, ккашигу, мякьгу, дяркъугу дурхIусса агьалинал кьадар ца яла агьамсса ишну хьуссар Буттал КIанттул цIанийсса Хъунмасса дяъвилул щалагу тарихраву.
Жунма тачIав дакIния къа­бу­ккантIиссар жула ялун бучIантIимунил, ватандалул ххуллий оьрмурдацIа хьуми, – увкунни ванал.
Муния махъ митинграй гьуртту хъанахъиминнал ца минутIрайсса пахъ багьаврийну дакIнин бивчунни Ленинград блокадалува буккан бувми.
Мероприятие къуртал хьунни Буттал КIанттул цIанийсса Хъун дяъвилия зана къавхьуминнансса гьайкалдануцI тIутIив дишаврийну.
«Январь зурул къув-аьс»

1944-ку шинал январьданул 27-мур кьини тарихравун дагьну дур Буттал КIанттул цIанийсса Хъунмасса дяъвилул ца яла оьмур иширал ахир шаврийну – 1941-ку шинал сентябрьданий байбивхьуну, 2 шин ва 8 зуруй лахъи ларгсса блокадалува Ленинград шагьру мурахас бувсса.
«Январский гром» операция байбивхьуну бур 1944-ку шинал январданул 14-нний ва къуртал хьуну бур январданул 27-нний. Ва кьини тарихравун дагьну дур душман ххит аврил ххуллийсса совет халкьуннал хьхьичIуннайшиву хIисаврай.
Ленинград хьуну бур дунияллул тарихраву сайки 900 гьантлий блокадалуву яхьун бювхъусса шагьруну.

Вихшалдарал лишанну хьусса ччатIул касак

Ленинград шагьру блокадалува буккан бувну 81 шин там шаврин хасну Лакрал райондалул школардай, детсадирттай ва цаймигу идарарттай хьунни мероприятияртту, дирхьунни аьпалул дарсру.
Вай мероприятиярттал мурад хьунни ялун нанисса никирахь лахъисса манзилданий душманнал вив лавсун бивкIсса шагьрулул агьалинал чувшиврия, чумартшиврия ва, яла-ялагу, ватандалийн дакI тIайлашиврия, ххувшаву ласаврил ххуллий жанну дуллуминная бусаву.
Щардал, Гъумучиял, Шав­кIуллал, Хьурттал школардай хьунни акция «Блокадный хлеб».
Акциялий гьуртту хъанахъиминнахь бувсунни блокада дуссаксса мутталий кьинилун булун ккаккан бувну бивкIсса125 грамм дусса ччатIул касакрая. Та ччатIул касакри тай оьсса гьантрай Ленинградуллал агьалинан оьрмулул ва вихшалдарал лишанну хьусса, та ччатIул касакрал ва ватандалухсса ччаврилли тай бивкIулул ва зулмулул хьхьичI бакIру лахIан дан къабивтсса.
Мероприятиялий бувккунни блокада дурхIуминнал чагъарду. Гьуртту хъанахъиминнайх бавчIунни оьрмулул лишанну хьусса 125 грамм лахIлахIисса ччатIул касакру. Ва хьуна мероприятиялий буминнайн асар биян бансса ишну.
Щардал школалий ккаккан дунни бусалардавун дагьсса Резо Чхеидзел «Отец солдата» тIисса фильм. Шиву ккаккан бувну бур дяъвилийн арснал хъирив лавгсса гуржиял ца чIирисса шяравасса хъунав хьусса хъудугьул кьадар. Дуклаки оьрчIал асардай лирчIунни бусалардавун агьсса актер Серго Закариадзел дакIнийхтуну цала арснахсса ва ватандалухсса ччаву ккаккан дуллалисса роль.
С. ХIабиевлул цIанийсса Халкьуннал театрданул райондалул библиотекалущал ва оьрчIал ­ библиотекалущал цачIуну бунни «Блокадный хлеб» ва «Радиогазета» тIисса акция.
КIичIиравух наниминнайх библиотекарттал зузалт бачIлай бия кьинилун Ленинградуллал агьалинан булун ккаккан бувну бивкIсса ччатIул касакру, тарихраягу буслай.
Акция сакин бувну бия сайки 900 гьантлул мутталий душманнал вив лавсун бивкIсса, дяркъу, ккаши ва мякь бувхIуну, душман шагьрулувун уххан къаивтсса Ленинград шагьрулул агьалинал виричувшиврия, кьянкьашиврия, ватандалухсса ччаврия ялун нанисса никирахь бусан­сса мурадрай.
Библиотекалул зузалт буслай бия кIичIиравух наниминнахь Ленинград шагьрулул блокадалия, цукун захIматсса шартIирдай ялапар хъанан ва зун багьлай бивкIссарив шагьрулул агьалинан. Бувсуна оьрмулул вихшалану хьусса «блокадалул ччатIуягу».
Цуппа ччатI цIубутIуй буллай бивкIун бур хIакьину бай­сса кьяйдалий. Амма иникьали чан личIлан диркIукун, даххана дурну дур мунил хасият. Тай кьянатсса кьинирду бакIрачIан дуркIминнан абадлий дакIний ливчIун бур та ччатIул тIин. «Блокадалул ччатIул» кьарал диркIун дур укунсса: 75 % — увал ини-кьаллул, 10 % — букайсса целлюллоза, ливчIми — чувалданувасса ххит.
Ялун нанисса никиран чара бакъа кIулну бикIан аьркинссар цуксса кьиматран дарцIуссарив жула ппухълуннан ххувшаву.
Зулайхат Тахакьаева