Уттигъанну ларайсса паччахIлугърал награда – медаль «За проявленное мужество» дуллунни лакралгу, Да­гъусттанналгу ххаллилсса арс, Дагъусттаннал халкьуннал виричу, жуна цинявннан ххирасса, хIурмат лавайсса Даххаев ­Муслим МахIаммадовичлун.

1999-ку шинал, ватандалийн кьини дурксса чIумал, ­Муслим МахIаммадовичлул ккаккан дурсса чувшиврия къабавсса Дагъусттаннай нажагьсса бухьунссар. Цала каялувшиндарайсса милицанал зузалтращал оьруснал аьскартуран къалхъанну авцIуну, «тай зучIан так жул жаназарттайхри гьан тIисса» увкусса ­Муслим МахIаммадовичлул махъру бусалдаравун багьну бур. Ванал цIа жула халкьунначIа мудангу бусраврай дуссар ва дикIантIиссар. Ванал чувшиву ялун нанисса никиран эбратну хьунтIиссар.
ХIурмат бусса Муслим МахIаммадович!
ДакIнийхтуну барча уллай буру ина лайкьсса наградалущал. ЧIа тIий буру цIакьсса цIуллушиву, гьарица ишираву тIайлабацIу. Мунияргу бюхттулсса наградарттал дайдихьуну хьуннав. Бюхълай личIаннав.