МукIру хьунна нагу: уттинин личIину блогертурал даврил хъирив бавцIунувагу къабивкIра. Ялунгума, ссигума бизлан бикIайва, шанма хха, махъру багьайкун кунницIун кув бавкьуну чичин къакIулсса инсантал чялиш буккаву машгьуршиврул хъирив багьну тIий. Утти блогертурал чулухунмай хIурмат багьунни.
Ххявххун бивзун бала-апатIру хьусса кIанайн биянсса кашигу дусса, бивукун хьумур бусса куццуй бусансса сантгу дусса, цIимилух мюхтажминнай цIими бувансса дакIругу дусса ми инсантал бия республикалий хъанахъимунил леххаву рутлай. Жугу паракьатну тийнмайну бавцIуну къабивкIру. Минналмур аудитория личIири, подписчиктал чIявусса бур. Миннал леххаврил чIу ччяни ашкара хъанай бур.
Масалдаран, Инстаграмрай (Аьрасатнаву къадагъасса сеть) Ккуллал райондалий дучри, оьллу марххалтталу ливчIун бушиврия леххаву рутлатисса ттул видео (апрельданул ряххуннийсса) 427 азара инсаннал ххал дунни. Вари ттулмур рекорд. Махъми видеорттал просмотр 50 азаруннийнгума къалавхъунни. Марххалттанивун кьувтIусса балчан буккан буллалисса ( апрельданул ацIунний) видео ххал дурну дур 46 азара инсаннал. Блогертурал видеорттал просмотру миллиондалийн дирсса ва миллионнаха лирчусса дур. Миннал леххаврил чIу циняв регионнайн ва билаятирттайн биллай бия. Минналми ресурсирдай цIакьгу бур, гьай-гьай. Гьаннайсса, гьамин блогертурал кабакьаврийнугур Дагъусттаннал агьалинан кумагрансса арцу лябуккулий датIлай бивкIсса фондругу, идарарттугу. Ва ялагу, блогертал цивппагу иширайнусса кумагру буллай бия. Чачаннал Республикалиясса блогер Асхаб Тамаевлул бакIрайн лавсуна 20 квартира булун къатри бакъа ливчIминнан. Цува Мамедкъалалийх уккайхту, ванал агьалинахь тавакъю бувна соцсетирдайсса публикациярдай лайкру бихьлахьияра, ца лайкрахлу ххюра къуруш хIисав дурну, роликирттахлу квартирарду машан ласунсса арцу салкьи дан хъанай дунутIий. Хасну на нава дакIнийхтуну барчаллагьрай бура ва хъамаличунайн, жула шяраваллил кIива кулпатран квартирарду булун бакIрайн лавсун тIий ва махъгу бацIан бувну тIий.
КIилчинмур квартира буллуна миллион лайк хьуннийнагу къаавцIуну. Вайва гьантрай цала чулуха 5 миллион личIи бувна блогер Михаил Литвиннул. Амма Аьрасатнал ПаччахIлугърал Думалул депутат Бийсултан ХIамзаевлул ванай аьй дурна, «трагедиялийсса хайпру» къаххуйссар, энергетикирттал реклама дуллан къабучIиссар куну. «Наркота къаххуйссар, энергетикру къаххуйссар, алкоголь- къаххуйссар», – увкуна ХIамзаевлул блогернахь. ХIамзаевлул махъру асар хьуну, блогер Асхаб Тамаевлулгу кумаграл даву дяличIангума дурна, кIицI лавгуна цува я хайпирдах, я арцух мюхтажну акъашиву, кьини дурксса инсантуран кумаг бувансса бакъа цамур мурад бакъашиву.
Цу уссар Дагъусттаннай «наркотикругу, энергетикругу, хIангу ххуйссар» тIисса? Талан багьлай бухьурча, талан аьркинни ттучаннащал, рестораннащал, наркотикру дахху-ласу дуллалинащал. Та диркIссар Дагъусттаннай кумаг буван увкIсса инсаннай, хъамаличунай аьй дуваву ххуйшивуну? Дагъусттаннал агьалинал илданун ккаккан дунни цамургу ххуйсса хасият : хъамаличунал хIурмат лахъсса бушиву ва хъамаличунан къаччан бикIан буван къабацIантIишиву.
Суккурагу къадуванна Хамзаевлухлу букканмигу бувкшиврул тема. Махъ учин анавар уккаву – гьарнаща хьун бюхъайсса ишри. БакIрай авцIуну, гъалатI бакIрайн ласавугу гара чувшиврул ххуллийссар. Утти ттулмур чарил чIучIа чунни учирча, телеведущий Владимир Соловьевлул «ахъувуннни». Телеведущая Виктория Бонялгу хIарачат бунни Дагъусттаннай хьусса балардах ва зараллах агьали къулагъас дуван буван. Ванил ца миллион буллунни кумагран. «Дагъусттаннал агьлу гъилисса агьлур. Оьруснал кулпатру къашавайсса оьрчIан арцу датIлатIисса ппурттуву дагъусттанлувтал мудангу гьуртту шай. ЦIанакул вайннан кумаг бувансса чIун дуркIунни», – увкуна ванил подписчиктурахь. МукIру хьунна, тачIав царагу телепередача «Дом-2» ххал къадурссар, му передачалия гъалгъа тIутIиний на аьвамссара. Викториял дусгу бакъара, муттаэгу бакъара. Амма федерал каналданий хъамитайпа кьювкьу-кьадар буллалисса махъру учаву – му лайкьсса даву дакъар. Ва ялагу, федерал канал – чиваркI чапалсса махъру тIун бикIай кIанурив?
Дагъусттаннал агьалинал илданун ккаккан дунни мяърипат, хъамаличунал хIурмат цачIава мудангу лахъну бушиву.
ПатIимат Рамазанова
