Уттигъанну оьрмулул 90 шин хьунни ххаллилсса лаккучу, Совет Союзрал чIумал лахъсса къуллугърайгу зий тамансса захIмат бивхьусса, ГьунчIукьатIрал шяравасса Аьбдуллаев Жабраил СилахIуттиннул арснан. 90 шин шаву ххишала бакъа агьамсса иш хъанай бур, цанма юбилярнан бакъассагу, мунал кулпатран, гъанчунан, гьалмахтуран. Му сававну дакIнин бутангу багьлагьиссар му инсаннал бивтсса ххуллу.
Жабраиллул оьрчIшиву тIайла дарцIуну дур гай яла захIматсса дяъвилул шиннардийн. 1943 шинал 7 шинавусса Жабраил сайки гьарца кьини ссят 5-нний кIюрххила изан айсса ивкIун ур колхозрал звеньевойну зузисса чIаххуврайсса Аьйшал: «Изу, ххирама, изу. На вин яла ххуйми ттукригу хIадур бав», – тIий. Жабраилгу, бувцуну ми ттукригу, лагайсса ивкIун ур бувцусса ххулув ягу ттивхIусса къама буххин. Мяйжаннугу, чIун захIматсса диркIун дур, та чIумалсса оьрчIру мюрщину бунува хъуни шайсса бивкIун бур.
ЗахIматсса чIун диркIнугу, личIину ххисса чIун къаличIлай диркIун дунугу, Жабраиллун дуккаву хъинну хьхьичIунну диркIун дур. Къуртал бувну школагу, ва увххун ур Москавливсса Щинал хозяйствалул инженертал хIадур байсса институтравун ва лархьхьуну дур гидроэлектростанцияртту байсса касму.
Дуклакисса чIумал Жабраил, цала рувхIанийсса кIулшиврул даражагу авадан баншиврул, лагайсса ивкIун ур хьхьичIунсса Москавуллал театрдавун, личIи-личIисса операрду, балетру, классический концертру ккаккан. Шиккува учин, ванал цала оьрмулухун гьарцагу зий ивкIсса кIанттурдал тарих, аьдатру, хасиятру хъинну лаласайсса диркIун дур.
Институт къуртал бувну махъ ва тIайла увккун ур зун Къиргъизнавун, Орто-Токой тIисса бартхьхьири (плотина) буллан. Ванил хъирив зий ивкIун ур Гуржиянавусса Сион ва Арманинавусса Артик бартхьхьирирду буллай. Вай шаннагу республикалий зий ванал аьмну шанна шин хьуну дур. Институтраву дурккумур цIакь даву дакъа, вай шиннардий ванан чIярусса касмурдугу лархьхьуну дур – ва зий ивкIун ур бурильщикну, слесарьну, мастерну, инженерну, прорабну. Шиккува Жабраил коммунист партиялувунгу кьамул увну ур. 1963 шинал апрель зуруй ва зана хьуну ур Дагъусттаннайн тамансса давурттугу канилух дурккун, ххуйну даврил хIалгу кIулсса инженерну.
МахIачкъалалив ва най уна кьамул увну ур проектру ва сметарду дайсса группалул хъунаману «Дагестанводстрой» тIисса идаралийн. Вара шинал Жабраиллул бувну бур кулпат, Лайли тIисса цалва шяравудуш бувцуну. Ва хьуну бур Жабраиллул оьрмулухунсса дакI тIайласса дуснугу, ванал къатлул цIакьсса ттарцIнугу. ХIакьинусса кьини вайннал хъанай дур цану яхъанай 63 шин. Кулпатрая ихтилат хьувкун, оьрчIаягу шиккува ца-кIива махъ чичинну. Вайннал хъуни бувну бур ххаллилсса кIива душ ва ца оьрчI. ОьрчIру ччянива, лавайсса даражалийсса кIулшивурттугу ларсун, цалла-цалла давурттайгу зий, кулпатирттал хьуну бур.
КIулсса куццуй, Совет заманалул чIумал хьхьичIунсса специалистътал тIайла буккайсса бивкIссар зун жущалла дусшиврийсса хIукуматирттайн. Мукун тIайла буклакиминнал сияхI цIакь дайсса диркIссар Москавлив хъунисса кабинетирттаву. Му куццуй, хьхьичIунсса специалист хIисаврай, 1965 шинал Жабраилгу тIайла увкссар зун Египетнавун, Асуан тIисса дунияллийх цIа ларгсса бартхьхьири буллан. Шанна шинай тикку зузиссаксса хIаллай ванал цалва лахъсса даражагу ккаккан бувссар. Жабраил тикку зий уна тиччаллил даврих бурган бувкIссар Совет Союзрал ХIукуматрал председатель Алексей Косыгин ва ванащал Египетнал президент Гамал Абдел Насиргу. Вайннал кIинналагу бивщуссар хъинну лахъсса кьимат дуллалисса даврин. 1968 шинал январь зуруй хьуссар Асуан бартхьхьирил цалчинсса агрегат итабакьаву. Му иширал ялув тиккун увкIсса Египетнал ХIукуматрал председательнал цаппара хьхьичIун бувксса зузалтран дуллуссар паччахIлугърал медальлу. Миннавух Жабраиллунгу.
Гъинттул 1968 шинал Жабраил зана хьуссар Дагъусттаннайн. Ва ивтссар цIуну дурсса «Главдагестанводстрой» тIисса идаралул технический управлениялул хъунаману. Ва къуллугърайсса инсан цIакь айсса ивкIссар Дагъусттаннал обкомрал бюрорай ва цуппагу министрнал къуллугъращал архIалсса къуллугъран ккалли байсса бивкIссар. Ва куццуй оьрмулул 32 шинаву Жабраил зий ивкIссар хъунмасса ва хъуннасса жаваблувшиву дусса къуллугърай. «Главдагестанводстройрая» хьуссар Дагъусттаннай ца яла хьхьичIунсса идара, загълунсса материально-технический базагу бусса. Ва идара лахъсса даражалийн лахъавриву хъуннасса гьурттушин Жабраиллулгу дурссар. Цалла гьанусса даву дуллалаву дакъассагу, ва увчIуну ивкIссар «Главдагестанводстройрал» парторганизациялул секретарьнугу.
1976 шинал март зуруй «Главзарубежводстрой» тIисса Москавливсса идаралул Жабраил цIунилгу ккаккан увссар чил хIукуматрайн зун тIайла буклакиминнавух. Ва тIайла увкссар кIира шинайсса Сириянаву дуллалисса щинацIун дархIусса сооружениярттай зун, производственно-технический отделданул хъунаману. Сириянаву хьхьичI бивхьусса масъаларттугу лажин кIялану щаллу бувну, 1978 шинал мартрай Жабраил зана хьуссар МахIачкъалалив.
Зун ивкIссар гава цала къуллугърай, Технический управлениялул хъунаману. Ва ххуллухьгу «Главдагестанводстройрал» Жабраилгу гьурттуну дурссар диялсса давурттив. Щин дишайсса аьрщив хIадур дурссар, Буйнакскалий калпушру байсса завод, Шамхаллай –Железобетонный завод, Хасавюртлив – Ремонтно-механический завод, ва мукунна цаймигу агьамсса давурттив дурссар.
Сентябрь зуруй 1984 шинал Жабраил шамилчингу тIайла увкссар дазул кьатIув. Ва ххуллухсса аьрххигу хьуссар Алжирнавун, тикку цайми билаятирттаясса организациярттал буллалисса щинал хозяйствалуцIун бавхIусса объектру кьамул буллан. Тикку зузисса чIумал хьусса ца иширая чара бакъа бусан аьркинни. Ца цIусса объект буллай бивкIун бур Япониянавасса организациялул, га бувансса проектгу дурну диркIун дур американал фирмалул. Га проект ххал дуллан ивкIукун, Жабраиллун хIисав хьуну бур гивусса гъалатI. Цуппагу му гъалатI савав хьуну Алжирнал чулуха нахIакьдан харж хьун най диркIун дур 30 азаруннийн дирсса тонна цементрал. РартIун дур совещание. Тамансса хIаллай дискуссиягу дуллай бивкIун, махъва-махъгу Американал инженер мукIру хьуну ур га мяйжаннугусса гъалатI бушиврий. Американал фирмалий диялсса аьчIа ирхьуну дур, Жабраиллун тIурчан, Алжирнал вакилтурал чулуха багьа лавайсса бахшиш дуллуну дур.
Шанна шинайсса контракт къуртал хьувкун, 1987 шинал сентябрь зуруй Жабраил зана хьуну ур шавай.
Дагъусттаннайн зана хьуну махъ Жабраил гава цалва къуллугърай зун ивкIун ур – «Главдагестанводстройрай». Амма му чIумал Совет Союзрай сукку хьуну диркIссар перестройка, иш-тагьар даххана хъанай диркIссар. Цала даврий 60 шин хьуннин зийгу ивкIун, Жабраил пенсиялийн увкссар. Амма ва зукъазий, игьалаглай аьдат хьусса инсан акъар. Пенсиялийн уккайхтува зун ивкIун ур «Микрохирургия глаза» тIисса идаралий хъунама инженерну. Мичча лавгун махъ ванал ялагу 18 шин хьуну дур Баргълагавал Каспийскаллал щинал хозяйствалул идаралий инженернал къуллугърай зий ва 84 шинаву (!) ахиргу кьариртун дур паччахIлугърал даву.
Цува зузиссаксса хIаллай Жабраил кIийла-шамийла увххун ур аспирантуралувун, амма чил хIукуматирттайнсса командировкартту сававну диссертация дуруччинсса чIун къархьуну дур.
Ванал чивчуну буссар «Гидростроительнал дакIнин бичавуртту» тIисса лу, луттирайгу хъинну хъиривгу лавну бувсун буссар цалва оьрмулия, даврия, цува зий ивкIсса паччахIлугъирттая.
СилахIуттиннул арс Жабраиллун ватандалул ххуллий бувсса захIматрах дуллуну дур «Дагъусттаннал лайкь хьусса строитель» ва мунилла хъирив «Аьрасатнал лайкь хьусса строитель» тIисса цIарду. Вай дакъассагу, ванал дур чIярусса грамотартту, барчаллагьрал чагъарду, бахшишру. Дур Асуан шагьрулий бартхьхьири буллай дурсса хьхьичIунсса ккаккиярттахлу дуллусса медальгу.
ЧIа чин ччай бур хIурмат лавайсса Жабраиллун вания тиннайгу цIуллушиву, чурххаву гьавас, тазашиву ва паракьатсса дакI! Ина мудангу, оьрчIругу, оьрчIал оьрчIругу лагма лавгун, рахIатну, вила аьзизсса кулпат Лайлищал оьрмулия щалихханнин итаннав!
Зиябуттин ХIажимирзаев,
Дагъусттаннал лайкь хьусса строитель
