Лакрал райондалул администрациялул бакIчи Зураб КуччаевлучIа хьунни детсадирттал хъуниминнащалсса батIаву.
Ва анавархъиндарайсса батIаву сакин дансса багьана хьуну бия, Зураб Куччаевлул цала бусаврийну, цIусса дуккаврил шинаву цалчинмур классравун лавгсса ацIния урчIа оьрчIава анжагъ ца-кIиннан бакъа лакку маз кIулну къалякъаву.

БатIаврий гьуртту хьунни райондалул бакIчинал хъиривмур Эльмира МахIаммадова, КIулшиву дулаврил управлениялул каялувчи Сулайман Шахмилов, КIулшиву дулаврил управлениялул пишакар Асият Сулайманова, детсадирттал каялувчитал Лиана Муртузялиева ва Зулайхат Макьсудова.
«Гьарца оьрчIачIан гъан хьуну, цIухлай ивкIра лакку маз кIулну бурив-бакъарив. ЯхI гъавгъун ливчIунна, чIявуми оьрчIан къакIулну лявкъукун. Ва жула миллатрал ялун биллалисса балари, пашмансса ишри. Жура руцан ритлай буру никирттал дянивсса дахIаву дарзун диркIсса ххал. Мазралли ядайсса миллатрал дакIгу, аьдатругу, аслийшивугу ппухълуннал жунна кьариртсса», – увкунни Зураб Куччаевлул.
Мунихун детсадирттал каялувчитурал кIицI лавгунни оьрчIру шаппату букIлай бушиву лакку маз къакIулну, мунийн бувну, идаралий программа оьрус мазрайсса духьувкун, лакку мазрах диялсса къулагъас дуллансса шартIру дакъашиву. Амма чаранну ляхълай буру, увкунни.
«Гьарца нитти-буттая тIалав буллан ттуща къахьунссар, – ххи бунни райондалул бакIчинал, амма ттул буржри зул хьхьичI дишин кьянкьасса тIалавшин – зува зузиссса кIанттул вив лакку мазрай гъалгъа тIун, зущала зувагу, оьрчIащалгу».
Шиккува нитти-буттайнгу лаизан ччива. Школалул, анжагъ, кIулшивур дуллалисса, ниттил мазрахсса ччаву тIурча, кулпатравур татлатисса. ЦукунчIавсса дарсирдал къабугьантIиссар оьрчIал ичIува нитти-буттащал ссупралух буллалисса гъилисса ва нахIусса гъалгъалул, шанух дуккайсса саннардал ва магьрал кIану. Шаппа гьарца кьини баллалисса гъалгъа бакъахьурча, оьрчIан му ххира къахьунтIиссар.
Амма так ца педагогтурая тIалав буллай, масъала щаллу къахьунтIиссар. На оьвтIий ура зуйн, гьарцаннайн, ххирасса нину-ппу! Азарвагу миннатри!
Кьюкьала мабизларду зула оьрчIащал лакку мазрай гъалгъа тIун! Гьалгъа тIутIияра ужагърай ниттил мазрай! БувчIин буллалияра гьарца мукъул мяъна. Гьарца кьини ичIува сагъсса гъалгъалулли маз бивчIан къабитантIисса. Маз сагъссакссар миллатгу сагъсса.
Маз бухлаган битарча, жувагу тарихрава бухлаглагиссару. Му хьун битан къабучIисса ишри. Бачияра хIакьинува байбишиннуча жула ужагъирттай лакку мазрай гъалгъа тIий»!
ТIалав бунни ишла буллан программалуву лакку маз лахьхьин баврин кабакьу буллансса тIуркIурду ва балайрду. КIулшиву дулаврил управлениялул зузалтраягу тIалав дунни кьянкьасса ялув бацIаву.
Лажин хIадур дурссар
Зулайхат Тахакьаевал