Аьрасатнал президент ­Владимир Путиннул Каспийскалиясса дагъусттанлув Шамил Усттарбековлун буллунни Щалагу Аьрасатнал халкьуннал фронтрал кубок.

Гужсса гъараллу ларчIун шяраваллу щинахьхьун ларгун диркIсса чIумал, Шамиллул ххассал увну ивкIссар 23 инсан – дяркъусса щинавун ухлай, цаннал хъирив ца щинавату буккан буллай ивкIссар хъами ва оьрчI-бакI. Мачча-гъансса ганах луглай бивкIун бур цаппара гьантрай, Шамил тIурча, чан-кьансса шанугу лавхъун, ялагу ­инсантал ххассал буллан икIайсса ивкIун ур.

Дагъусттаннал бакIчинал чIумуйнyсса кIанайма Ф.Щу­киннул тIимунийну, Усттарбековлул гьунар хIисав хьуну бур яла бюхттулмур даражалий – ва дур гьарца дагъусттанлувнаву чувшиву душиврий ва иш багьсса чIумал цала жандалий хIайп къаучайсса ушиврий мукIру шаву.

«Дагъусттан муданма бивкIссар ва уттигу буссар вирттаврал кюруну.
Республика пахрулий дур вияту!» – увкунни Щукиннул.