Вай гьантрай «Россия 1» каналданий дия Чувашиянал Кубокрал кIилчинмур этапрал наградартту ларсъсса чIава фигуристътураясса сюжет. Вайннавух Сяид Халитуев тIисса оьрчIгу ия. Пикри хьунни ва лаккуоьрчI ухьунссар кусса, мукун лягу-лявкъунни.

Аьхъардал шяравасса Халитуев Сяид Арсеннул арс – Чувашиянал Республикалул фигурный катаниялул федерациялул тарбиялув, 120-ннийн бивсса чIавасса ва кьянкьану микIирай бавцIусса фигуристътуравух увккун ия «Чебоксары арена» микIирал Дворецрал дянив. Спортрал ва журалухун агьну, микIирай авцIуну дурагу шин хьунугу, ванал «Жаркая зима», «Йошкин Кот», «Зимние забавы», «Весенняя капель – 2024» цIанилусса ва цаймигу бяст-ччаллай бувгьуну бур цалчинсса ва кIилчинсса кIанттурду. Сяид ххуйсса кьиматирттай дуклай ур 6-мур классраву. ДуккаврицIун ингилис мазрал школалийнгу, тренировкардайнгу занай, спортрал ца яла ккаккан ххуймур журалухун агьну.
Ца-кIива махъ ванал нитти-буттаягу, хъунама уссиягу.

Сяидлул ппу Арсен, МахIачкъа­лаллал шагьрулул 38-мур школалия махъ Машлул ва кулинариялул училищагу къуртал бувну, чIярусса шиннардий цалва пишарай зий ивкIун ур «Лезгинка» ресторандалуву. Чувашиянавун лавгун, Чебоксардай зий, кIул хьуну ур Ирина тIисса чувашдушнищал. Бувцуну увкIун му цалла ватандалийн, бувну хъатIи, бувну ташу ислам дин кьамул дурсса чувашдушнищал, Дагъусттаннайва ялапар хъанан бивкIун бур. Ших увну ур вайннал хъунама арс Даниял. Даврил иширттайн бувну, вайннал кулпатран цIунилгу Чувашиянавун бизан багьну бур.
ЦIанасса чIумал Арсен Халитуев жамилий капитаннал кумагчигу Охотский хьхьирий ур. Ванан, цал­сса, цала оьрчIал спортравусса вай махъсса хьхьичIуннайшивурттая къакIулссар, хьхьирий дахIаву дакъа тIий.

Ца-кIива махъ Арсеннул мархраягу. Ванал нину-ппу – Аьхъардал шяравасса Халитуев Нажмуттин Аьлиллул арс ва Халитуева Зулайхат Гъазибуттал душ. Ла­ккуя шяраваллурду гужирай дизан дуллалисса чIумал вай мюрщисса бивкIун бур. Хъуни хьуну, дурккуну, Нажмуттиннуя хьуну ур строитель, партиялул зузала. Зулайхат, инженер-экономист, Москавуллал куклу промышленностьрал университетгу къуртал бувну, чIярусса шиннардий цилва пишалий зий бивкIун бур шагьрулул администрациялий, Дагпотребсоюзрай, Проектный институтраву. Жагьил хьуну, ташулул хьуну, вайннал дянив хьуну бур 3 оьрчI: ца арс ва кIива душ. Арсная Арсеннуя лавай бусарду. Динарая хьуну бур музыкант. КIилчинмур душ Гульнара Мамашева, ПаччахIлугърал премиялул лауреат, ОьрчIал художествалул школалул директор, ДР-лул культуралул лайкь хьусса зузала, республикалий чIявучин кIулссар.
Арсеннул хъунама арс Даниял оьрмулул 7 шинаву, Дагъусттаннай ялапар хъанахъисса чIумала, агьну ур карунний ияврихун ва панкратиондалухун. 2019-ку шинал ваная хьуну ур Аьрасатнал чемпион ва Италиянаву панкратиондалул чемпион. ЦIана Даниял дуклай ур Къазаннал паччахIлугърал университетраву.
Ирина зий бур ххуйшиврул салондалуву.

– Щукру Хъунасса Заннайн цимурцаннахлу. Ттулва оьрчIру гьарца ххув хьутарив ттун ччан бикIай вай Да­гъусттанная бушиву баян бувну. Жу гьарца гъинттул бучIару Да­гъусттаннайн, МахIачкъалалив. Гьарца бувкI­тарив оьрчIру вибуцIай ккавкказуллал энергиялул. Жул дакIру мудангу мякьну дикIай Дагъус­ттаннах, – тIий бур Ирина.
Ванин хъинну ххирар Дагъус­ттан ва ваницIун дархIусса цимурца. Ва кIанттуцIун бавхIуну ­уссил щарния укун буслай бур Гульнара:
– Ирина бур ляличIиссава душ. Ванияр шиннардил хьхьичI, ва жул уссил Дагъусттаннайн бувцуну учIайхтува, ванин най буна ххира хьуна Дагъусттангу, Ккавкказгу. Лархьхьуна дуван жула миллатирттал циняв дукрарду. Арххун тихавай бунугу, жучIан оькъавку­сса ца гьантта къабувай. Дагъус­ттаннал цимурцаннуй махIаттал-хIайран хъанай бикIай. Ттул ттула арсгу спортрахун агьну уссар, ва Да­гъусттаннал ва СКФО-рал чемпион хьуссар цимийлагу. Ца ххуллухь Чебоксардая арх бакъасса Казань шагьрулийн лавгссия арс соревнованиярттайн. Ирина, бувцуну цилва оьрчIругу, лавгун бия тихун, жулва оьрчIахлу буклан. Стадиондалий «Дагестан, вперед!», «Ребята, вы лучшие!» тIий, жулваминнахлу мукунсса шавкьирай буклай бивкIун бияхха, махъсса жагьилтал ттул арснахь махIатталну цIухлай бивкIун бия та цуя жухлува таксса буклакисса тIий. Вана укун ххаллилсса уссил щар дуссар жул, жун ххаллилсса ­уссил арсругу бувсса ва хъуни буллалисса, – тIий, буслай бур ва.
Вана укун­сса кулпат бур Халитуевхъал. Умуд бур вай гъинттул Дагъусттаннайн бувкIсса чIумал хьунабакьин ва гьарта-гьарзану вайнная кIул хьун, чичин бюхъан­ссар тIисса.

Бадрижамал Аьлиева