И.С. Сеченовлул цIанийсса Москавуллал 1-мур медициналул университетраву хьунни «Герои нашего времени» тIисса мероприятие.
Микку, ларгсса шинал хIасиллугу дурну, пишалул ххуллий ххуйсса ккаккияртту чIалачIи дурсса хIакинтуран дуллунни личIи-личIисса наградартту.

2024 шинал «Ангелы» тIисса командалул Дунияллул халкьуннал дянивсса Исламрал бизнесрал Ассоциациялущал цачIу кумаг бунни 3278 къашайшалан.
Мероприятиялул сакиншинначитал хьунни Дунияллул халкьуннал дянивсса Исламрал бизнесрал ассоциация, «Ангелы» землячествалул команда ва И.Сеченовлул университетравусса дагъусттанлувтурал ккуран.
Ва дузрайн дуккан дан хъунмур хъар лархъунни онкологиялул къашавайминнал масъаларттаха зузисса Марат Кабаевлул советник Разита Мусаевал.
Шикку гьуртту хьунни мюхтажшиву дусса къашайшалт уква хъин буллалисса медициналул клиникардал хьхьичIунсса хIакинтал, медициналул вузирдал преподавательтал ва студентътал, ПаччахIлугърал Думалул депутатътал. Дагъусттаннал Халкьуннал Мажлисрал депутат ХIусман Кадиевлул ва «Анжи» футболданул клубрал президент ХIабибуллагь МахIаммадовлул гьар мудан кунма мероприятиялул харжлугъ цала бак1райн лавсунни.
Дунияллул халкьуннал дянивсса Исламрал бизнесрал ассоциациялул ва мунил президент Марат Кабаевлул чулуха захIматсса тагьарданувусса инсантуран кумаг буллалисса хIакинтуран Барчаллагьрал чагъарду буллунни Разита Мусаевал.
– На дакIнийхтуну барчаллагь тIий бура «Ангелы» командалухь инсантуран буллалисса хъунмасса кумаграхлу. На ххарира ттущара хьхьичIунсса чумартсса хIакинтурал ккуран сакин дан бюхъаврия. Вай вирттавран ккалли бан буч1иссар.Зу дурсса хъиншивуртту-хъинбаларду Хъунасса ЗанначIа кьамулну лякъиннав. Зул ужагъирттай барачат бишиннав, – увкунни ванил.
Андриана Аьбдуллаева