Лайкьсса даражалий кIицI ларгунни республикалий Дагъусттаннал Халкьуннал цашиврул кьинилун ва Аьрасатнал Халкьуннал цашиврул шинан хас дурсса байран.

Шанма гьантлул дянив инсан уккансса кIану бакъая МахIачкъалаллал Хъун майданнив ва Родоп бульварданий.
Хъун майданнив най дия «Вместе ради единства» тIисса культуралул марафон. Родопский бульварданий най дия – дунияллул халкьуннал дянивсса фестиваль «Хранители традиций».
БувкIун бия щалагу Аьрасатнавасса ва дазул кьатIатусса хъамал.
Сентябрьданул 15-нний, Дагъусттаннал Халкьуннал цашиврул кьини ахттая махъ тIурча, Хъун майданнив дия яла агьаммур байран – Аьрасатнал язи-язими коллективирттал гьунарду ца сахIналийн бавтIсса хъинну яргсса концерт. Цилгу цачIун бунни ватан, мунил тарих ва магьирлугъ ххирасса личIи-личIисса оьрмурдал ва миллатирттал агьлу.
Байрандалий гьуртту хьун бувкIун бия Москавлиясса, Татарсттаннаясса, Хакассиянавасса, Къалмукьнавасса, Донбассраясса хъамал.

Шадлугъ тIитIлай, Аьрасатнал Федерациялул Советрал хъунмур Валентина Матвиенкол кIицI лавгунни Дагъусттан – му бушиву
цила авадансса тарих, магьирлугъ, аьдатру ва чумартсса агьлу бусса билаят. Шичча бувккун бушиву щалагу Аьрасатнавух ва дунияллийх цIа ларгсса композитортал, шаэртал, художниктал, артистътал ва спортсментал. Машгьурну душиву шикку лярхъусса ляличIисса ва аслийсса канил касмурдугу.
«Дагъусттан – хъанахъиссар цивилизациярттал ва культурарттал ляличIисса шанбачIуну, чумартсса ва ­аькьилсса инсантурал минану.
Республикалул агьалинал цимигу ттуршукурдал дянив, руцан къадиртун, дунияллун эбратранну дурурччуну дур миллатирттал дянивсса дусшиву, нахIу-хIалимшиву ва цашиву. Шикку хIурматрай дуручлай бур язи-язими ­аьдатру», – увкунни ­Валентина Матвиенкол.
Хаснура чIурчIав дурунни республикалул агьалинал хъунмасса захIмат бихьлай бушиврий Аьрасат буруччаврил ва цIакь баврил ххуллий. ДакIнин бувтунни Буттал кIанттул цIанийсса Хъунмасса дяъвилий, 1999 шинал республикалийн чапхунчитал ххявхсса чIумалссагу ва хIакьину хасъсса аьралий операциялий дагъусттанлувтурал дуллалисса чувшиву.
Республикалул бакIчи (врио) Фёдор Щукиннул кIицI лавгунни Дагъусттаннал халкьуннал цашиврул гьану цIакь буллай бушиву жува куннал кув бувгьуну, цаннал ца бурувччуну, буттал аьрщи ххирану ялапар хъанай бушиврул.
«Дагъусттан – чIяву миллатирттал рангирдай щавшсса халичар. Гьарца миллатрал бур цила маз, магьирлугъ ва аьдатру. Амма циняв цачIун бувну бур аьмсса тарихрал ва кьадарданул, – увкунни ванал.
– Гьашину Дагъусттаннал Халкьуннал цашиврул байрандалул гуж ххишала хъанахъиссар, 2026 шин, билаятрал бакIчинал хIукмулийн бувну, Аьрасатнал Халкьуннал цашиврул шинну баян бувну буну тIий.
Дагъусттаннал агьалинан республикалул ва ­Аьрасатнал цашиву цанния ца батIул дан къашайссар. Жунма кIулссар цачIушиврул кьимат. ХIакьину жула ватанлувтал буссар хасъсса аьралий операциялий ватандалул мурадру буручлай. Азаллий­сса инсантал буссар аьралитуран кумаг буллай, талатиминнал кулпатирттал чIарав бацIлай. Мугу – цашивур, аьлтта чIалачIисса ва иширайнусса.
Цал ттигу барча тIий ура на зухь байран! ДацIаннав буттал буттахъал дурур­ччусса цашиву дакьаврил ва аслахIшиврул цIакьсса гьануну. Цашиву дуруччирча, Дагъусттан буруччаврищал дуручлачиссару жула гьарцаннан аьмсса ватан – щала Аьрасат!».
Концертрай гьуртту хьунни цIанихсса къавтIаврил ансамбльлу: А. Александровлул цIанийсса Аьрасатнал аьралуннал ансамбль,
Н. Надеждинал цIанийсса академический ансамбль «Березка», академический ансабль «Донбасс», Къалмукьнал паччахIлугърал академический ансамбль «Тюльпан», Татарсттаннал ва Хакассиянал ансамбльлу ва жула «Лезгинка», аьралий оркестр, Дагъусттаннал гьарца миллатрал халкьуннал артистътал.
Зулайхат Тахакьаева