Августрал 18-нний АьФ-лул Президентнал Администрациялул бакIчинал цалчинма хъиривчу Сергей Кириенкол ва Дагъусттаннал бакIчинал чIумуйсса кIанайма Федор Щукиннул «Доблесть гор» тIисса республикалул программалул выпускниктуран буллунни дипломру ва хъамакъабитулунсса ссятру. 

Проектрал лагрулий СВО-лул 35 ветераннал кIулшиву ларай дунни паччахIлугърал ва муниципал управлениялул бутIраву. Вайннал дуккаву лахъи ларгунни ца шинал мутталийсса. Ветерантуращал зий бия давуртту канилух дурксса наставниктал, властьрал органнал каялувчитал, федерал экспертътал. Программалул гьурттучитурал опыт ва кIулшиву тIалавну дур паччахIлугърал идарарттай. Миннавату чIявуми давурттал дузал бувну бур ДР-лул БакIчинал ва ХIукуматрал Администрациялий, Халкьуннал Мажлисрал аппаратраву, Минимуществалий, Минприродалий, республикалул шагьрурдал ва районнал администрациярттаву.
«ХIакьинусса кьини, дунияллий укунсса вызовру дусса чIумал, билаятрал мурадру цалами мурадирттаяр хьхьичIун буккан бан лахъну бишин хIадурсса инсантал личIи буван аьркинссар элиталувун, пикри-зикрилул лидерталшиврийн, билаятрал кадрардал луртандалувун. Цинявннахь барчаллагь тIий ура зул чувшиврухлу, зу республика ва билаят передовойлий лайкьну ккаккан баврихлу. ХIурматрал махъру учин ччай бур Дагъусттаннал арсваврал фронтрай ккаккан дуллалисса чувшиврухлу. Мунил хъунмасса пахру хьун буллай бур, Дагъусттаннал халкьуннан бакъасса, щала Аьрасатнал халкьуннангу», – увкунни Сергей Кириенкол. Федор Щукиннул тIимунийну, Дагъусттаннай цалчинми субъектирдавух зузи дурну дур «Доблесть гор» тIисса СВО-лул ветерантурансса жуламур региондалул программа, му хъанахъиссар «Время героев» тIисса федерал программалул ца журану (аналогну). «Зу цинявннал ярагъгу кIунттихьну исват бувссар зува патриотътал бушиву ва Ватандалийн дакI тIайлашиву. ЦIана зул оьрмулуву дайдихьлахьиссар цIусса ятIап: утти зул ярагъну хъанай дур зура ларсъсса кIулшивуртту, опыт ва даврил хIал кIулшиву. Утти зуща бюхъантIий бур давуртту дачин дуван паччахIлугърал ва муниципал къуллугъирттай. Жу ялугьланну зул ттинияр тиннайми давурттах, лайкьну ккаккан бувара зула бюхъу-тяхъа билаятрансса хъиншивурттал цIаний», – увкунни региондалул бакIчинал.
Программа бартдигьавриха зий бур ДР-лул БакIчинал ва ХIукуматрал Администрация ва РАНХи ГС-лул ПаччахIлугърал управлениялул лахъмур школа.
Ва программалувух гьуртту хьунни кIия лаккучугу. Миннавасса ца Оьма Чариновлущал жу редакциялий бувсса ихтилат бищунну хъиривмур номерданий.
ХIадур бувссар
ХI. Аьдиловлул