Аьдатравун дагьсса куццуй, август зурул байбихьулий, Хъурхъив гьарца кIани-кIанттайх кIама бивщусса ватанлувталгу бувкIун, шайссар хъунисса шадлугъру. Гьашинугу, цIакь хьусса аьдатрайн бувну, вара чIумал шяраву хъуннасса уттарашиву дия.

Цалчинна-цалчин, дунни субботник. Хъирив кIира кьини хьунни арамтурансса ва оьрчIансса спортрал бяст-ччаллу. Хъаннил ва душваврал дянив сакин дурну дия цамур журалул конкурсру: лакку мазрал ва диндалул темалийн дагьайсса викторинартту.
Хъирив шяраву хьунни зунттал районнан хъинну агьамсса иширан ккалли дансса стоматологиялул конференция.

Мероприятиялийн бувкIун бия, Хъурхърал шяравасса бакъа, Щардал, Хъуннащиял ва Ххюлуссуннал шяраваллавасса студентъталгу. Конференциялул сакиншинначину ия медициналул элмурдал доктор, Нижневартовск шагьрулийсса «Маэстро» тIисса стоматологиялул клиникалул хъунама хIакин ОьмархIажи Наибов. Ванал кIицI лавгунни шяраву спартакиада гьашину ацIния кIилчин хъанай душиву, ларгсса шинал сакиншинначитурал даххана дуршиву мунил формат. «Жула шяраваллава дурккун дур стоматологтурал цимирагу ник. Вайннава чIявусса зий бур республикалул кьатIув. Жул мурад – жула бюхъурдая жагьилтурахь бусавур. Мунил ххуллийссар ва конференциягу», – увкунни ОьмархIажинал.

Конференциялул программалий гьуртту хьунни хьхьичIунсса пишакартал: ОьмархIажи Наибов, МахIачкъалаливсса «Сирона» тIисса стоматологиялул клиникалул хъунама хIакин Кьурбан Халидов, «Маэстро» клиникалул хIакин-ортопед, хирург Мусттапа ХIамзаев, жагьилсса хIакин Камалуттин Дибиров.

Вай цинявппа хIакинтурал бур, Аьрасатнаву бакъассагу, США-наву, Италиянаву лавхьхьусса опыт.
Гьуртту хьуминнал кIицI лавгунни докладирттал лавайсса даража. Хъиривмур шинал сакиншинначитуран пикри бур конференциялийн оьвчин райондалул цаймигу щархъава бувксса стоматологтурайн.

Зулайхат Тахакьаева