ТтурчIайнна-Зунтту чIявусса иширттайну тарихравун бувхссар. Цикссагу дяъвирдал барачи хьуссар. Ккаркссар дяъвилул къизгъиншиву Надир-шагьнал ва Хан-Муртазааьлил заманнайра.

Туркнал ва Ираннал аьраллу ххяхлай, лакращал ТтурчIайнна-Зунттуй хьуссар питнарду. Ва зунттуй тамансса оь экьибувтIуссар. ТтурчIиял агьалиналгу цикссагу зулмурду бувхIуссар, амма щилчIав ва ссалчIав хьхьичI бакI лахIан къадурссар. Усттарну, чувшиву ххи хьуну бувкссар цикссагу оьсса лахIзардава. Къавхьуссар щищачIав ТтурчIиял инсанталгу мютIи буван, шяравалугу духлаган дуван. Надир-шагьнащагума мютIи дан къархьусса шяравалуя кIа. Амма Бу­ттал кIанттул цIанийсса Хъун дяъвилул чIумал дизан дурссар шяравалу, кьанив, Ауховский район диркIсса кIанттайн.

Школалий дуклаки заманнай жу лагайссияв ТтурчIайнна-Зунттуйн экскурсиялий. Га чIумал ТтурчIиял шяраву сагъсса шаннайра къатри дия (шанма кулпат бия Ккурклиясса, Кьубатусса, Куматусса) цала маэшатран яхъанай, ятту-гъаттара ябуллай.
ВицIхъиял махIлалия ТтурчIив экскурсиялий лагайссия чIявусса дуклаки оьрчIру. Нагу хьуссара ТтурчIив шамийлва 20-мур ттуршукулул 60-ку шиннардил дайдихьулий. ХьхьичIва-хьхьичI лечайссияв школа бивкIсса кIанттайн.

Дяъвилул дайдихьулий ТтурчIиял школалий ттул ппу, Аьлиев ХIажи Гъужиевич, зий ивкIун ур 2 ставка ва бачIиннуй, амма харж ласайсса бивкIун бур ца ставкалух (га чIумал чIявусса инсантал мукун зий бивкIссар). Ккурклия ТтурчIайн ахьтта занай ивкIун ур. Ттул ппу, кIюрххицIуна шавату увккун, цIаннай зана шайсса ивкIун ур Ккурклив. Тай шиннардий кIа шяраву уссавагу 2 учитель ивкIун ур. Ца директор, ца ттул ппу.

Магъив дакъасса, леркьсса, чу­ллаха бярчIари хьусса къатралва буслай бия, гай цуксса агьамшиву дусса диркIссарив. Гай диркIун дур заллу усса къатри, оьрчIан школа тIитIин аьркин хьусса чIумал, ишла дан укра дуллусса. ЦIувцIучарил лажинтру дусса, хъунисса дарвазарду бусса чIярусса цаймигу къат­ри дия эяллайн дурксса. Экскурсиягу бувну, нанийни, аьжаивсса асарду хIасул шайва жуву. Га чIумал чIявусса затру бувчIлан къабикIайва, ца аьжаивну, жухь анавар мабуккару, бацIияра, тIисса кунмасса асардал дакIру видуцIайва…
Вай асардал буслай бухьунссия ТтурчIиял аьрщи инсантурах цуксса мякьну, аьтIий, цихьра цурда гьуя тIий диркIссарив. Гьавагума бия ТтурчIиял шяраваллил ялув сукку къатIий бавцIусса кунмасса.

Бусласаврийн бувну, ттул ппу школалийн форма дакъа къаитабакьлакьисса, мажал бакъасса инсантурал оьрчIан школьный форма ва аьркинсса кьай-кьуйлул хъирив лагайсса ивкIун ур. Ганал цала буттахь, Гъужихь, бувсмунийн бувну, ттун бувчIунни, ТтурчIай яхъанай бивкIсса агьлу, маэшатрал ялавайсса бунугу, хIалимсса, захIмат ххирасса, хъинсса, кIулшилул бувччусса бивкIшиву. Гания махъ ларгунни 60-хъул шинну. ЦIана ТтурчIиял шяравалу диркIсса кIанай, мурчал, зунчал хъяхъа чин дурну, аьтIий диркIсса магъал аьшру ча дикIави, эяллал аьшругума чансса лирчIун дур. Яла ххуй-ххуйми чартту, гай хъунисса цIувцIучарттува, аьрщаравун бювкьун лавгун бур. ХIайп. Цимилгу хIайп. КIай ТтурчIиял зунттайн я щувкун, ттул дакIнивун, я куклусса дакъасса, я кIусса дакъасса, ца пашмансса пахъшиву дагьай. Га чIумух бурувгун кIай авурсса къатрал чIиртту дяъвилий ливтIусса вирттавраха лахьлай бия.
ТтурчIиял ва Ккурккуллал дянив муку-тукунсса дусшиву къадиркIссар. ДиркIун дур гъилисса уссурвалшиву. Жу бакъа цару тIисса Ккурккул ччаврил кIалайрду дичлай бивкIссар ТтурчIиял шяравун. Мичча душ буцин ччан бивкIманахь, му шяравасса бакъархха къаучайсса бивкIссар.

Агь ТтурчIий, ТтурчIий, бикIан бакъаяв зу цIанакулгу зула кIанттай. Урттун къататанссия Ккурклия ТтурчIайнсса, ТтурчIая ЧIухъивсса жегъирххуллурду. Га аьрава лагай ххуллугу тти шагьраххуллийн кIура бавну бикIанссия.ТтурчIи ва Ккурккул кIия уссил хъунисса кулпатру кунма бикIанссия.ТтурчIи лиян бувну махъ, ЧIухъивсса жегъирххуллурдугума цайнува цивппа ливунни. ЧIухъивгу бивкIссар ТтурчIи сававну хьусса, Ккурккуллал шяравасса чIявусса хъамал хьуссагу, ташурдал бувсса маччахъулгу, ­гъанчувгу.

ТтурчIайнна-Зунтту

ТтурчIайнна-Зунттуй ТтурчIий,
Зунттул ухнилу Ккурккул,
Аьраварттай гьан шайсса
Дянив дусшиврул ламуй.

КIирагу шяравалу
ДиркIссар уссурвал кунна,
Цавайннан хьусса зарал
Гайминнан къаччан бикIлай,
Цавайннал бувсса хъатIай
Цинявппа цачIун хъанай.

Аман, ТтурчIайнна-Зунттуй,
Ина аьтIий бакъарав,
Лякьлул оьрчI кунна чIалай
Шяравалу дакъаяв.

Вил бурхIай ТтурчIи бия –
КIира зивулий къатри,
Къатрал ахIвал майшан тIий,
ЦIувцIучарттал лажинтру.

Аьрки-аьркинмур дусса
Дузалсса шяравалу
Мина дирхьу кIанттая
КьунуцIа сукку хьуну.

Тти ТтурчIиял щарния
Эяллурагу дакъар.
Шяраваллия лирчIмур
Микку-тикку чартту бур.
P.S.
Бухьунссар аьтIийнма ТтурчIиял-Зунтту,
Бухьунссар бявкъунма марцIсса щаращив,
Чапхунсса ка дирзун кIачIа хьурчагу,
Аьрщаравун дюркьун къатри гьарчагу,
Вил цIа чунчIав ттигу дюркьун къаларгссар.
ЛухIи кьини дуркIун, лухIисса бала
Вил тIабиаьтрайхгу бувккун лавгнугу,
Вила оьрчIал бувсса хIарачатирттал
Вил цIа дур ядуллай щархъиял дянив,
Хъисрагу куклу хьун чара бакъа тIий.
Вил арсру ва душру бур дунияллийх
Вил ххаллилшиврулмур цIа тикрал дуллай,
Оь-хъинсса иширттал ций цачIун буллай,
ЗахIмат масъалартту цачIу ххал бигьлай.
Мюрш-кьюршсса хIисавртту лагма
кьариртун,
ЗахIматшивуртталгу ялтту ша лавсун
Вил­ арс Шахмандаров –
цаннан къаавцIур,
Вил арс Шахмандаров – цинявннан авцIур.
Увккунни майданнив цаща шаймур бан
Талатиминнангу шайсса кумаг бан.
Цуксса бухьурчагу, ца кьиниссагу,
Дяъвилул паранну арх дан нижатну.
Цала магьиршиву ва усттаршиву
Кумаграйн дуккансса хIарачат бунни.
Лакрал агьалинал дакIнил куртIшиврий
ТачIав ликъаххайсса буссар барчаллагь….
Ккаллиссар Арслангу зиранг саллатIнан
Жан харж дан хIадурну аьрай талайсса.

Ханича Аьлиева,
ш. Ккурккул