Мартрал 27-нний Каспийскалий Аьли Аьлиевлул цIанийсса Спортрал дворецраву хьунни Дагъусттаннал Республикалул бакIчи Сергей Меликовлул сипталийнусса республикалул ифтар. Ваний гьуртту хьунни 5 азаруннийн бивсса инсантал: региондалул бакIчиная цаява тIайла хьуну, мюрщи оьрчIайн бияннин.

Бусравсса хъамаллуравух бия «Аьрасатнал бусурманнал РувхIанийсса собраниялул» муфти Альбир-хазрат Крганов, Татарстаннал муфти Камил-хазрат Самигуллин, Донецкаллал ва Луганскаллал Халкьуннал Республикарттал муфтитал Рашид-хазрат Брагин ва МухIаммад Исмаил-хазрат Гамбаров.
Мажлис байбивхьуна мубараксса Кьуръандалувасса аятирттайну. Хъирив хъунмасса экрандалий ккаккан дурна Рамазан зуруйгу, шинал лажиндарайгу Республикалул Муфтиятрал личIи-личIисса миллатирттал инсантал цачIун баву, лагма лаган баву мурадрай дуллалисса давурттаясса ролик.
Мажлис бачин бувну ия Султан Трамов. Ва мажлисрай хьхьичIва-хьхьичIсса махъгу ванал буллуна Сергей Меликовлухьхьун:
– На ххарину ура хIакьину ччянияра шиннай цилла рувхIа­нийшиврийну, кьянкьашиврийну цIа ларгсса Дагъусттаннал аьрщарай хъанахъисса, Заннал цIими ливксса ифтарданий зухь гьарцаннахь ча бувкру учин, яла-ялагу – бусравсса хъамаллурахь – муфтитурахь, жучIанма бучIансса чIунгу, кашигу ляркъусса. Зу хIакьину жущал бушаврил чIалачIи дуллалиссар бусурманнал цашиву, цIакьшиву. Барчаллагьрал махъру учин ччай ура паччахIлугърал сек­ретарь МахIаммадсултан Байбулатовичлухь, ва ифтарданийнсса хIадуршиндарал хъу­ннасса хъар цайнна ларсъсса. Ванащал жу хIакьинува бувкру ялунчIинмур ифтарданий цукун ци дуван хъинавав тIисса ихтилатрайн. Мубараксса Рамазан зурул жувура ххи дуваннав цашивугу, гужгу, ххувшаврийнсса вихшалагу, – увкуна Сергей Меликовлул.
Хъирив региондалул бакI­чинал «За заслуги перед Респуб­ликой Дагестан» орден дуллуна ­Аьрасатнал спортрал ­лайкь хьусса мастер (тхэквондо), ларг­сса шинал Парижлив хьусса Паралимпий тIуркIурдал арцул ­призер АьлиасхIаб Рамазановлун. Ва кьинисса наградар­ттавух региондалул бакIчинал АхIмад-Хан Султаннул «За вклад в патриотическое воспитание молодежи» тIисса медальлу дуллу­на динчитуран – СВО-рал ­гьур­ттучитуран.
Ихтилатру бувна Дагъустта­ннал муфти, щайх АхIмад Апанни Аьбдуллаевлул, вай гьант­рай республикалул ­бусравсса ­хъамалну хьусса, цайми регионная бувкIсса динчитурал, СВО-лий арснацIагу, ласнацIагу хьу­сса, Казбековский райондалиясса Аминат Абужанатовал ва ­цайминнал.
Гихунмай жагьилтурал ща­ллу бувна нашидру, дуклаки оьрчIал дурккуна назмурду.
Мажлисрай хьуна умра-хIажлийнсса путевкардал розыг­рышгу. Ваний гьуртту хьуншиврул бавчIуну бия 4 азарва билет. ТIайлабацIу хьуна 20 инсаннан, вайннахьхьун гьарцагу бусурманчувнай ялувсса хIаж буван гьансса сертификатру дуллуна Сергей Меликовлул.
Цила чIун дирукун, шиккува, дворецравува, увкусса акбарданухун цинявнналагу архIал итадаркьуна зума.
Жулла республикалий дурсса ифтардаву яла хъуннамур хьу­нни лавайсса даражалий.