Ися МахIаммадов

Ватандалухь

Жул дакIурдил кашилул
БакIщаращира ина,
Жул талихIсса оьрмулул
Гьанугура битавсса.

Ина жул муданнасса
Интра ва аьрщарайсса,
Ххазинагура ина,
Багьа бищун къашайсса.

Дусшиврул цIакь хьун бувсса
Къалагура ина жул,
Цайми билаятирттан
Эбратсса Ватангура.

Ласланнав ина ттигу
ЦIу-цIусса ххувшавуртту,
ЦIусса чIумул бакIчийну
Дачиншиврул хьхьичIуннай.

Дагъусттан

Жул пахру вицIунни,
Вирттаврал минай,
ЧIяву миллатирттал
Дусшиврул кюруй.

ЧIявур вил хъамалгу
Хъун Ватандалий,
Кьамулгу бувара
Ина ми лайкьну.

Вил бюхттул зунттурду
Цал янин ккавкнан
Яла оьрмулухун
Хъамакъабитай.

Жул аьзиз Дагъусттан,
Жул дакIнил давран,
Жул давла инара,
Дингу инара.

ЛичIаннав гьар шинах
Ина цIу лаглай,
Дунъяллийх цIа ларгсса
Ххаллил Дагъусттан!

Лакрахь

Багьаннав зувун гъира,
Дулуннав зухьхьун кьудрат,
ЦIулаган дан щархъурду
Буттахъал миналийсса.

Жува бухьувкун лахъсса
Аькьлу-кIулшилул агьлу,
КъабучIирхха ялттува
Лакку кIанттух буруглан.

Бачи байбишиннуча,
Цинявппа цачIун хьуну,
КIура баллан лажинну
Аьзизсса Лакку улклуйн.

Хъинникьай

Кьинигу дайлиртIуну
Хьхьу лирккунни аьрщарай.
Бувккун зунттул хъачIниха
Хьхьу чанна дунни зурул.

Лагмара хIасул хьунни
Караматсса лишанну,
Хъинникьай барзгу ссавний,
ЦIаннайн данди бацIаван.

Ттул ссалам

ЛухIи-цIансса ттуруллул
Кувни кIучI бай чанна баргъ,
Бивчуну микI, аьтIи дай
Аривсса оьрчIи тIутIив.

Бурандалул лиян бай
ТIутIайх бивчусса мурхьру…
Ттул ссалам инсантурайн,
Хъиншиврул вибувцIусса!

ЛачIлай дур майрай гъарал –
ЛачIлачувча иминну.
Бишлай бур бявкъусса марч –
Бишлащувча хIаллицIух.

ЛачIлай дур цIу къавтIилий –
ЛачIувча кьаралданий.
Най ур инсан кьатIувай –
Зал архIалну насувча.

* * *
Инсаннан ччатI булайссар
ЛачIа ххяххай аьрщарал,
Мякьлин хIачIайсса щингу
Личай аьрщаравату.

ТIутIив, ахъру, ахъулсса
Шай аьрщарай гьар шинах,
Гьарца рухI дусса затрал
Оьрму дузал хьуншиврул.

ТачIав атомрал цIарал
ПIякь чин къаданнав Аьрщи.

ДакI дуцIин дувай

Аьрщарал ххют кунна –
Ялув някIсса ссав,
Гъаргъ – мусил ашрапи,
КIанийх сайр буллай.

Щарнил лув щаращи –
Гъаргъ арцул парча,
Ццуццуй хъункIултIутIив
Мурчахь щурщулий.

Ар – тIутIай щарщусса
ОьрчIи халича.
Зунттул чулух хIалу –
ХIайрансса накьич.

ПархтIутIи – бургъил нур
Ахъ чанна буллай,
Жюружанттул чюхру –
Ххяллул чурх шюшлай.

Ххарисса асардал
ДакI дуцIин дувай,
Я щувкун лагмасса
Вай суратирттайн.

ЧIун – цурку

Ца-цаних тIий, дацлай,
Оьрмулул шинну,
ЧIун дур цила тарих
Авадан буллай.

Ляхълай акъар цучIав
Ва дунияллий
Ва «цуркун» багьайсса
ТанмихI кьукьинсса.

* * *
Аьрщарай муданнасса
Дакъассар ца цичIаргу,
КъадикIантIиссар гьанай
Мудан цурда Аьрщигу.

Инсантал, мабулларди
Зу аьрщаран зараллу,
КъабацIаншиврул ганил
Оьрму чIун дияннинма.

* * *
ЦIущуллал аьлимтал,
Зун хъун барчаллагь,
Авадан хьун бувсса,
Миллатрал тарих!

Элмурду ттирикIлай,
Зу бувсса захIмат
ЛичIантIиссар дарсну
Махъа нанинан.

* * *
ДакI хъинсса инсаннавар
Ххуйсса тIуллу дуккайсса.

* * *
Хъярч бан къакIулнал хъярчгу
Хъун питналийн буккайссар.

* * *
Арцуйн иман дирхьума
Гайннул лагъ хъанахъиссар.

* * *
Ттуккул заллу – чай,
Чал заллу – ттуккуй.

* * *
Винма къакIулмур кIул бан
КIулнахь цIувххуну хъинссар.

* * *
Духмур шин ларгунни,
ЦIумур дуркIунни,
ЦIу-цIусса хияллал
Ттул дакI дурцIунни.

* * *
ДакI дуцIай ххаришиврул,
Ххи шай чани яруннин,
ЦIущар, ина ххал хьувкун
ЦIусса къатрал цIу дурну.

* * *
Бавкьуну къазурча
Канийсса кIисри,
Дузрайн къадуккайссар
Дуллали даву.

* * *
Цурда отпускрайн гьаннин
Ссут дур мурхьирдаяту
КьатI буллай хъахъи чIапIив.

* * *
КIачIа хьусса мусил ссут –
Мюршну ларчIсса гъаралу
ЛуххацIа чурх марцI буллай.

* * *
КIа баргъ аьрщаран кунма,
Нину аьркинссар оьрчIан.

* * *
Аьдада бувтсса гьантрал
Оьрму лахъи къабайссар.

* * *
Шаэрнал шаэршиву
Оьттувура дикIайссар.