Укунсса цIанилусса («Мой маленький Дагестан – мой огромный мир…») выставка хьунни Пятигорскаллал краеведческий музейраву. Ва хьунни «Культура» тIисса Национал проектрал лагрулий.
Шикку ккаккиялун дирхьуну дур Дагъусттаннал Аь. Тахо-Годил цIанийсса Национал музейрал экспонатру, цалгу жулла республикалул халкьуннал ляличIисса культура, багьу-бизу чIалачIи буллалисса.
Выставка тIитIлатIисса ихтилатраву Пятигорскаллал краеведческий музейрал директор Юлия Золотаревал барчаллагь увкуна Дагъусттаннал Национал музейрал каялувшиндарахь, республикалул агьалинал оьрмулущал кIул хьунсса сант даврихлу.
Музейрал зузалтрал бувуна хъамаллурансса экскурсия, цил лагрулийгу гьарта-гьарзану бувсъсса жулла чIяву миллатру бусса республикалул аьдатирттая, канил касмурдая, багьу-бизулия. Бувсуна шикку ккаккиялун дирхьусса цIа дурксса художниктурал (Е. Лансере, М. Жамал, В. Шлепнев, Н. Лаков ва м.ц.) творчествалуву Дагъусттаннал бувгьусса кIанттуя.
– Ларгсса ттуршукулул 60-70-ку шиннардил Дагъусттаннан пишкаш бувссар билаятрал художествалул хьхьичIунсса вузру къуртал бувсса художниктурал щаллусса плеяда. Ва чIумул ляличIишивунугу хъанахъиссар художниктурал живописьрал цалла давурттаву дакIнил хIал, инсаннал хасиятрал лишанну ккаккан дувансса хIарачат, мукунссаннун ккалли дуван бучIиссар Альберт Хаджаевлул, уссурвал ХIасан ва ХIусайн Ссунгъуровхъал ва цайминнал давуртту, – увкуна выставкалул куратор Аида Кьурбановал.
Выставка тIиртIуну дикIантIиссар августрал 18-ннийнин.
* * *
Пятигорскалий «ТАСС Кавказ» региондалул информцентрданий вай гьантрай тIиртIунни Ухссавнил Ккавкказуллал оьрмулиясса выставка.
Шикку ккаккан бувну бур Ухссавнил Ккавкказуллал, ХХ-мур аьсрулул дязанния байбивхьуну, хIакьинусса кьинилийн бияннинсса оьрму. Вагу чIалачIи бувну бур агентствалул Ухссавнил Ккавкказуллал циняв регионнайсса фотокорреспондентътурал суратирттайну.
Экспозициялий дур Ухссавнил Ккавкказуллал аруллагу региондалул тарих ва уттисса замана чIалачIи буллалисса суратру, вайннувух – ляличIисса ва нажагь дакъа хьунакъадакьайссагу.
Бадрижамал Аьлиев
