ЦIуссалакрал райондалул администрациялий хьусса ирглийсса батIаврий хIасул бунни Дагъусттаннал аьрщарайн ххявхсса дунияллул террористътал ххит бувну 25 шин бартлаглагисса иширан хас дурсса мероприятияртту хIадур дуллансса, ми тIайла дуккавриха зунсса сакиншиннарал комитет. Заседаниялул даву дачин дурну ия ЦIуссалакрал райондалул администрациялул бакIчи МаматIи ХIамзатов.

Шикку ххал бивгьуна 1999 шинал ЦIуссалакрал аьрщарайн ярагъуннищал бувхсса къачагътал ххит бувну 25 шин шаврин хас дурсса мероприятияртту даврил масъалартту.
Райондалул администрациялул аппаратрал, Культуралул ва КIулшивуртту дулаврил управлениярттал, райондалул СМИ-рдал вакилтурая хIасул бувсса сакиншиннарал комитетрал члентурал сакин дурна райондалий вай мероприятияртту кIицI лагансса план.
Бувсуна юбилейрацIун дар­хIусса мероприятияртту сентябрь зурул 15-ннийнин дан аьркиншиву.
ЛичIинува ххал бивгьуна та ппурттуву яла агьаммур талатаву най диркIсса «Телевышка» лахъазанттуй жан дуллуминнан ва ТIюхчардал шяраву Аьрасатнал Виричу Алексей Козиннун дирхьусса гьайкаллачIа, кIирагу шяраваллаву бувсса аьпалул багъирдачIа дантIисса мероприятиярттал хIакъиравусса масъалартту.
Заседаниялул даврил хIасиллу дуллай, МаматIи Бижаевичлул сакиншиннарал комитетрая тIалав бувна райондалул тарихраву агьамсса кIану бувгьусса юбилейран хас дурсса давуртту жаваблувну биттур даврил ялув бацIан аьркиншиву.
– Цинявннан ххуйну дакI­нийссар жула халкьуннайх кьини дурксса дяъвилул гьантри. Тай иширттаву Дагъусттаннал халкьуннал ккаккан дурссия хIат-хIисав дакъасса чувшиву, цачIушиву, куннал кув бугьаву. Цила бикIайкунсса дяъви най бивкIссар 1999 шинал сентябрь зурул гьантрай ЦIуссалакрал райондалийгу. Яла чIявусса ливтIуссагу, бивщуссагу шиккур хьусса. ЦIуссалакрал райотделданул 32 милицанал зузалал, Аьрасатнал аьралитурал, ополчентурал ва укунмасса халкьуннал жанну дуллуссар Ватан дуручлай. Укунмагу чIявусса бакIрачIан бувкIсса ЦIуссалакрал агьулданул ва кьинигу къучагъну лархъссар, – увкуна райондалул бакIчинал.
Имара Саидова