Гьашинусса дуккаврил шинал дайдихьу хьунни Вихьуллал шяраву чIянияцIава буллай «долгостройрайн» кIура бавну бивкIсса, ахиргу дузал хьуну, дуккаврил шинайнсса бахшишну хьусса школалий. 

Вихьуллал шяраву цалчин «халкьуннал стройкалий» бувну бивкIсса школа тIивтIуну бур 1928-ку шинал. Ганияр махъ вана ларгун дур 98 шин. Жува хIакьину укун ххаллилсса школалул къатравун ша ласласийни, ххаришиврул дакIру дурцIуну буру.
Школалул хьхьичIалу цин лавхьхьуну чIюлу бувну бия.

Дуклаки оьрчIру, учительтал, оьрчIал нину-ппу ва жямат барча буван увкIун ия Ккуллал райондалул бакIчи Ажуб ХIусманов. Мукунма гьуртту хъанай бия Вихьуллал шяраваллил администрациялул бакIчи СайкIу Сулайманов, шяраваллил депутатътурал бакIчи Кьади Аьбдуллаев, чIярусса шиннардий Вихьуллал шяраваллил администрациялул бакIчину зий ивкIсса МахIаммад ХIусайнов, цIуну школалул директорну ивтсса Оьма Чаринов.

 Ия шикку мукуна га кьининин чIярусса шиннардий школалул директорну зий ивкIсса Аьлил МахIаммадов. Буккан бувуна Аьрасатнал ва школалул ттугъру. Яла щаллу дуруна Аьрасатнал ва Дагъусттаннал гимнру. Дуккаврил шин барча дуллалисса махъру лавхъуна ХIусманов Ажублул. Хъирив махъ буллуна Чаринов Оьмахьхьун. Ва цувагу ур хасъсса аьралий операциялий гьуртту хьусса чув.

– Украиннавусса дяъвилий тIайлабацIу къахьурчагу захIматсса щаву дияврийну, цIуну бувсса школалул цалчинма директорну итаврил чулухамур тIайлабацIу хьушиврун хIисав буллай ура, – куна ванал. Махъру лавхъуна мукунма Аьлил МахIаммадовлул, СайкIу Сулаймановлул, Сааьдат Аьбдуллаевал, МахIаммад ХIусайновлул, СалихIат МахIмудиевал, МухIсин ХIажиевлул ва цайминналгу.

Муния махъ циняв оьрчIру цала-цала учительтуращал бувххуна цалчинмур дарсирайн.
ТIайлабацIусса хьуннав­цIусса школалул бухкIуллийх зу лавсъсса шаттирду!

ХIажимурад ХIусайнов