Нюжмаркьини Лакрал райондалул администрациялий хьунни кIулшиву дулаврил зузалтрал аьдатравун дагьсса Августовское совещание.

Муний гьуртту хъунни райондалул бакIчинал хъиривмур Эльмира МахIаммадова, КIулшиву дулаврил управлениялул каялувчи Сулайман Шагьмилов, райондалул Депутатътурал Собраниялул хъунама Явсупи ХIамзаев, кIулшиву дулаврил идарарттал каялувчитал ва зузалт.

Эльмира МахIаммадовал райондалул бакIчи Зураб Куччаевлул цIания кIулшиву дулаврил зузалт барчагу бувну, чIа увкунни тIайлабацIусса дуккаврил шин. Муния махъ Сулайман Шагьмиловлул цала гьарза-гьартасса докладраву бувсунни ларгсса дуккаврил шинал хIасиллая ва цIусса дуккаврил шинаву хьхьичI бихьлахьисса мурадирттая.
КIицI лавгунни яла агьамсса къулагъас дуллан тIий бушиву щалагу Аьрасатнаву цIуну щурущи дуллай дайдихьлахьисса проектирдах. ЦIусса дуккаврил шинаву райондалий зий дайдишин тIий дур школалийн гьан бувасса оьрмулул оьрчIал рувхIанийсса ва мяърипатрал тарбиялул ххуллийсса проектру: «Добрые игры» – тIуркIулул журалий агьамсса иширттая бусласисса, учиннуча дуклаки оьрчIансса «Разговоры о важном» проектраха лавхьхьусса, школалийн гьан бувасса оьрчIаву лидершиврул хасиятру ялун личин дан кумаг буллалисса «Орлята дошколята».
Сулайман Шагьмиловлул дакIнин бувтунни райондалий зий душиву байбихьулул школалул оьрчIан укра гъилисса дукра дуллалисса программа.

 
КIицI ларгунни дуккаврил пландалуву хьусса дахханашиннарду: обществознание лахьлай байбишин тIий бур 9-мур классрая байбивхьуну, ххи дурну дур буттал кIанттул тарих лахьхьавринсса ссятру, дукьан дурну дур цалчинмур классрал дуклаки оьрчIан шардайнсса даву.
Бувсунни райондалий сакин бан дакIний бушиву луттирдал луртандалул фонд, оьрчIансса луттирдал щаллушиндарал ялув дуккаврил шинал дайдихьулий дан дакIний бушиву оьрчIал нитти-буттащалсса собранияртту.
Хасъсса къулагъас дурунни ГИА-лул хIасиллах. КIицI лавгунни экзаменну дуллалисса Гъумучиял школалий дузал дурну диркIшиву санитарно-эпидемиологиялул, цIу дагьаврил ва террорданул мюхчаншиву.
2026 шинал ЕГЭ-лул хIасиллая буслай, кIицI лавгунни ххуйчулиннайсса дахханашинна: ряхра предметрал баллу хьхьичIсса шиннардих бурувгун лахъ хьуну бур: математикалул, обществознаниялул, историялул, биологиялул ва информатикалул.
Явсупи ХIамзаевлул кIицI лавгунни кIулшиву дулаврил цинявппа идарартту хIадурну бушиву цIусса дуккаврил шинайн, гьарца школардал кабинетирттаву дурну душиву ремонт.
– ЕГЭ-лул хIасиллу ларайсса душиврул ккаккан буллалиссар
педагогтурал пишакаршиврул даража лавайсса бушиву, – увкунни ванал. Бувсунни медаллащал школа къуртал бувминнан администрациялул чулуха гихуннайгу дуллан тIий бушиву арцуйнусса бахшишру, цалчинмур классравун наниминнан тIурча, хьхьичIрасса шиннардий кунма, булун тIий бушиву школалул кьай-кьуйлул лащу-щаллусса портфеллу.
Ккурккуллал школалул информатикалул учитель Герман СалихIовлул бувсунни кIулшиву дулаврил даража лавай баврил ххуллий искусственный интеллект ишла баврия.
Уриннал школалул директорнал заместитель Асли МахIаммадовал доклад бия хъирив нанисса ник ватан ххирану тарбия даврил ялув.
Щардал школалул хъунмур вожатая Асият Аьлиевал бувсунни «Движение первых» тIисса щалагу Аьрасатнал проектрал лагрулий дуллалисса тарбиялул даврия.
Ахирданий кIулшиву дулаврил ххуллий дакI марцIну буллалисса захIматрахлу цаппарасса педагогтуран администрациялул чулуха дуллунни ХIурматрал грамотартту.
Зулайхат Тахакьаева