[dropcap]С[/dropcap]ентябрь зурул 1-нний ттул ниттил ссурахъин, 1-мур ЦIувкIуллал шяраваллил язисса арснан, Юнусхъал МахIаммадлул арснан Кьурбаннун хъанахъиссар 80 шин. БакIрайва учин, Юнусов Кьурбан , жун маччассар, пахру бан лайкьсса инсанни, ванал жухь дарс дирхьуссар, пахру бан лайкьсса учителли. Элмулуха зий оьрму бувтсса хIакьсса аьлимчуври.

ПатIимат Рамазанова
Увссар Кьурбан МахIаммадович ЦIувкIрав, агьалинаву хIурмат бусса учительнал МахIаммадлул ва давриву паргалсса, тIуллу уздансса ПатIиматлул кулпатраву. Шанма оьрчIгу ПатIиматлучIа кьабивтун, Юнусхъал МахIаммад аьрая зана къавхьуссар, ПатIиматлул яхIлий чивун буккан бувссар кIиягу арсгу, душгу, аьрая зана къавхьусса ласнал, виричусса совет хIаписарнал, аманатрайнгу хиянат къавхьуну. 1966 шинал Кьурбан Юнусов увхссар дуклан Дагъусттаннал университетрал химиялул–биологиялул факультетрайн. МарцIну ххювардай мугу къуртал бувну, гихунмаймур оьрмугу бавхIуссар му факультетрацIун.1971 шинал дурурччуссар химиялул элмурдал кандидатнал диссертация. Ванал канила дуркссар ххюцIалунниха лирчусса элмийсса давурттив, монографияртту. 1990 шиная 2001 шинайнин Кьурбан зий уссия химиялул факультетрал деканну. Сивсуну учин бучIиссар ва факультет лябукку буну ччаннай бацIан бувмагу вари куну.
ЧIярусса шиннардий бувсса дакIнихтунусса захIматрахлу ванал хIалал дурсса «Дагъусттаннал лайкь хьусса учитель» ва «Аьрасатнал КIулшиву дулаврил ва элмулул министерствалул бусравсса зузала», тIисса цIарду. Ятиншиву кIулну, хьхьичIун урувгсса, захIматрал кьад­ру кIулсса, къирият дусса ванал биялсса хIарачатгу бувну бур уздан­сса буттал ва ниттил цIа гьаз дуван, уссин ва ссин чул бищай ттарцIну хьун. Кьурбаннул кулпат Мариян, педагогикалул элмурдал кандидат, профессор, зий буссия Дагъусттаннал дарс дишаву магьир дувай институтрал проректорну, дуркку­сса бушивруцIун инсаншиву дусса, агьалинал дянив хIурмат ва сий ду­сса инсан буссия. Оьрмулул ва элмулул чагъираву бяливчIссия Марияннул оьрму, дувзрайн дуккан дуван къархьуссия тамансса элмулул давуртту. Кьурбаннул ва Марияннул дувзрайн дуккан дурсса давур­ттаву ца яла дюрхъумину хIисав хъанан бухьунссар миннал душру — Наида ва Заира. Наида зий бур ДР-лул БакIчинал ва ХIукуматрал Администрациялул информациялул политикалулсса буллалисса управлениялий, Заира – Национал банкрал юридический отделданул хъунмурну. Ппу барча уллай, буслай бур душругу цалвами пикрирду:
— Жун ппу, ппушиву къахIи­савнугу жул оьрмулуву цамургу бюхттулсса кIану бувгьусса инсанни. Буттал лажин къакIулсса жул буттал мудангу хIарачат бикIайва жунгу, жул оьрчIангу сахаватну дулун цува махIрумну ивкIсса аякьа ва ччаву. ДакIнихтунуру тIисса, акъахьунссар жулма куна, аякьа дусса ппугу, ттаттагу дунияллий цама. Жун ччя-ччяни дакIнийн багьай буттал къатлувусса дуссухалтту, чIявусса инсантал ца урцIух ккуркки лавг­сса. Чара бакъа баллантIиссия жул ичIува личIи — личIисса миллатирттал балайрдал гюргугу, макьаннал чIурдугу. Бу­ттал мандолина бивщукун, лакку балайрду итабакьайссия, аьпа биву, ниттилгу. ХIакьинусса кьинигу ппу жул оьрчIан яла хьхьичIунма дусгур, маслихIатчигур.
АхIмадов Сулайман, Дагъус­ттаннал паччахIлугърал университетрал информатикалул ва информацион технологиярттал факультетрал декан, кафедралул хъунама, профессор:
-Кьурбаннущалсса ттул дусшиву дайдирхьуна студент заманнайра. Тани му химиялул факультетрай зий ия, факультетрал коллектив кувннащал кув бавкьусса бия, микку профессор Ттаттаев Оьмардул биялагу хъунмасса бия, коллектив бугьан, нахIу-хIалимсса арарду цIакь дуван кIулсса каялувчи ия. Кьурбан мудан эбратранну зун икIайва, декан хIисаврайгу, преподаватель хIисаврайгу. Ххаллил акъасса, архIал зузиминнацIун авкьусса, дуллалисса давриву мудангу хьхьичIунсса ия. Му каялушиву дуллалисса ппурттувур химиялул факультетрай фармацевтикалул ва химиялул экологиялул цIусса направлениярттугу, цайми цIушиннардугу хьусса. МяйцIалку шиннардий жу мукьва зуруй цачIу буссияв МГУ- раву квалификация гьаз дуллай, му ппурттуву жул дусшиву хъиннура цIакьгу хьуна. Жул кулпатругу дустал хьуна, кувнначIан кув буххайссияв ччя-ччяни.
ХIусайханов МахIаммадбаг, ДГУ-рал аьмсса физикалул кафедралул хъунама, элмурдал доктор, профессор:
— Юнусов Кьурбаннул ва Марияннул кулпат кIулну, вайннащал дусшиву , маччашиву дуну лавгунни жул кулпатрал щалва оьрму. Кьурбан ЦIувкIуллал шяравасса цалчин хьусса аьлимтурал кьюкьлувассар, ванал хъунмасса захIмат бивхьуссар ЦIувкIуллал жагьилтал дуккин , итххяххан бан. На ттула хъунама­уссин кIану бувгьусса инсаннан Кьурбаннун чIа тIий ура лахъисса оьрму, цIакьсса цIуллушиву!
Кьурбанов МахIаммад, Халкьуннал Мажлисрал депутат, КIулшиву дулаврил, элмулул ва жагьилтурал иширтталсса буллалисса комитетрал хъунаманал хъиривчу:
— На Кьурбан МахIаммадовичлул студентра. ЛяличIийсса хIурмат ва сий дикIайва мунал студентътурал дянив, ччимур масъалалул хIакъираву маслихIат ккаккан муначIан бачайссияв. ХIакьинусса кьинигу дакIний бур, студентътал мунал лекциярттах ххишалану вичIилий бикIайва, студентътурал ва преподавательтурал дянив авторитет лахъсса дикIайва.
ХIакьинусса кьинигу му кка­ккангу, мунащал ихтилат бангу гъира бикIай ттунмагу, му ур ттул ниттил ссурахъу ас-намус бусса, къирият дусса, даймуниву чумарт­сса, цил икIайкунсса интеллигент. ДакI дарцIунугу бура мунал чаннасса цIа ялун нанисса никиран инсаншиврул, захIмат ххирашиврул, кIулшивурттал кьадру кIулшиврул, буттал аьрщарал хIурмат бушиврул эбратну личIантIишиврий!