ЦIанасса чIумал школалий каялувшиву дуллай бур директор Гаммаккуева Альбина ХIажиевна. Дур школалий оьрчIан тарбия ва куртIсса кIулшивуртту дулунсса шартIру, бур ххаллилсса учительтал. АцIния арула лавайсса даражалул пишакар. Миннавух бур Дагъусттаннал лайкь хьусса учительтал, Аьмсса кIулшивуртту дулаврил ва Тарбиялул сфералул хIурматлувсса зузалт. ЦIана «Земский учитель» программалий шиккун увкIун ур физкультуралул ва тарихрал дарсирдал учитель Арслан Бариев. Гьарица шинахсса ккаккиярттах бурувгун ЧIяйннал школа райондалул хьхьичIунсса школардал сияхIрай бур. ХIайп, цимилагу хIайп, лапва чанну бур оьрчIру. Увагу 30 оьрчI. ЧIяйннал школалул тарихраву цалчин хьуну бур цалчинмур классравун оьрчIру къабувкIсса иш. Бакъар школалий гьашину 3-мур ва 7-мур классру. 11-мур классраву увагу ца инсан ур. ОьрчIал багъраву ур 11 оьрчI, 5 зузала.
– ОьрчIру чансса бушиву цIана чIявуми щархъал школардал цIуцIи кIану бур.

 Ва я школалуща, я КIулшивуртту дулаврил управлениялуща щаллу бан шайсса масъала бакъар, республикалул даражалийсса хасъсса программа дикIан аьркинни. Инсантал шярава шагьрулийн къабизланшиврул, миннан шартIру дузал дан аьркинни. ОьрчIру чансса бунугу, жун даву чанну дакъар, хIарачат буллай буру муданма хьхьичIунсса ЧIяйннал школалул цIа яларай дагьан къаритан. Жул школалул дуклаки оьрчIал мудангу райондалул, республикалул, федерал конкурсирттай хьхьичIунсса кIанттурду бугьайссар. ХIакьину жучIа дуссия аьдатравун дуртсса школалул цила каялувшиндарал бувчIавуртту. Гьашину ххюйлчинсса шинни дуклаки оьрчIал цала дянив «президент» увчIлай. Му дуккаврил, низамрал, спортрал ва цаймигу давурттаву ттул урчIакану хъанахъиссар, – тIий, буслай бур Альбина ХIажиевна.

Мяйжаннугу, 2018-ку шиная шихунмай школалий каялувшиву дуллай, ванил хъунмасса хIарачат бунни школалул даража гьаз бан, хьхьичIуннайсса ккаккияртту чIалачIи дан. Ванил цилагу мусил медальданий къуртал бувссар ЧIяйннал школа. Дагъусттаннал университетрал юридический факультетгу къуртал бувну, шяравун бувкIун, школалий правоведениялул дарсру дихьлай бивкIун бур, яла бувххун бур педуниверситетрал математикалул факультетрайн. 2013-ку шинал бивтун бур оьрчIал багърал каялувчину. Микку зузисса шаннагу шинал дянив гьарзат цIу дуккан дурну, оьрчIан къулайсса шартIру дузал дурну дур. 2015-ку шинал ванил бюхъу-хъит ва хIарачат чIалай, бивтун бур Ккуллал райондалул КIулшивуртту дулаврил управлениялул хъунмурну. 2018-ку шинал ва бувкIун бур ЧIяйннал школа-багърал директорну. Шиккугу каялувчинал опытгу, гьунаргу бусса Альбина ХIажиевнал диялсса даву дурну дур школалул даража гьаз бан. Ва лайкь хьуну бур «Аьрасатнал аьмсса кIулшивуртту дулаврил хIурматлувсса зузала» ва «Дагъусттаннал лайкь хьусса учитель» тIисса цIардан.

Жу бувкIсса чIумал школалий бия завуч - лакку мазрал ва литературалул учитель Арсен Мяммакьурбанов, ингилис мазрал учительница Аминат Халилбагова, педагог-организатор ОБЗР («Основы безопасности и защиты Родины»), техникалул учитель Аслан Рамазанов. Аминат Халилбаговал кIия арс Тимур ва МахIаммад хасъсса аьралий операциялул гьурттучиталли. Хасъсса аьралий операциялий бур Аслан Рамазановлул, байбихьулул классирттал учительница Лиза Къубатаевал арсругу. ЧIяйннал школалул 18 выпускник ур хасъсса аьралий операциялий. Миннавух ур Совет Союзрал Виричу ЦIаххай Маккаевлул арснал, ЧIяйннал школалий физкультуралул учительну зий ивкIсса ЖахIпарханнул оьрчI Даниялгу. Тарихрал учительница ПатIима Рамазановал арснал чувшиврий жан дуллуну дур.

Школалийсса ххаллилсса Аьралий савлугърал музейраву хасъсса аьралий операциялий, Буттал кIанттул цIанийсса Хъунмасса дяъвилий, Авгъаннавусса, Венгриянавусса дяъвилул иширттаву жанну дуллуминнан цанма-цанмасса мурцIу личIи бувну бур. Гьай-гьай, музейраву агьаммур кIану бувгьуну бур Совет Союзрал Виричу ЦIаххай Маккаевлун хас бувсса кIанттул.

Шяраваллаву бакъа чара бакъасса социал объектирдавасса ца хъанай бур ФАП. Бивру жу миккунгу. ЧIяйннал шяравусса ФАП бувну ацIунния лирчусса шинну хьуну дур. 1992-ку шиная шихунмай муний каялувшиву дуллай бур Зарифа КьурбанмахIаммадова. Къизлардай медициналул училище къуртал бувну махъ кIира шинай Ашттарханнай Газпромрал поликлиникалийгу зий бивкIун, буттал шяравун зана хьуну, шикку зун бивкIун бур. Санитаркану зий бур Людмила Катаева. ФАП-рал аякьалулу ур 200-300- нния(кIинттул чIумал) 600-700-ннийн (гъинттул чIумал) бияннинсса инсантал. ЦIанасса чIумал кIива вилттилиоьрчIгу бур.