Дагъусттаннай лахъа-хъусса даражалий кIицI ларгунни Аьрасатнал Миллатирттал мазурдил кьини. Аьрасатнал Президент Владимир Путиннул хIукмулийн бувну, гьашину цалчин кIицI лаглагисса байран тIайла дарцIунни сентябрьданул 8-ннийн, Дагъусттаннал халкьуннал шаэр Расул ХIамзатов увсса кьинилийн.Аьсрурдал мутталий дусшиврий ва аслахIшиврий чIяву миллатру ялапар хъанахъисса Дагъусттаннал аьрщарай ва хъуннасса агьамшиву дусса кьинину хьунни.
Ва кьинилун хас дурсса шадлугъру хьунни щалагу республикалий. Дагъусттаннал миллатирттал дусшиву дуруччаву мурадрайсса «Моя семья – Россия» тIисса цIанилусса форум-фестиваль хьунни МахIачкъалалив. Шикку гьуртту хьунни республикалул шагьрурдаясса ва районнаясса творчествалул коллективрду. Фестивальданий «Родники традиций» тIисса программалул лагрулий, гьурттучитурал ккаккан дунни Дагъусттаннал миллатирттал культура, аьдатру ва багьу-бизу.
Муданма кунма, лавайсса даражалийсса творчествалул программа хIадур дурну, тамашачитал хIайран бунни ЦIуссалакрал райондалиясса «Дараччи» тIисса халкьуннал фольклорданул ва вокалданул ансамбльданул.