Хасъсса аьралий операциялий гьуртту хъанахъисса чIивима сержант Жамалуттин Амирхановлул бувсунни ва зурул ахирданий хьунтIисса Дагъусттаннал бакIчи Сергей Меликовлул «тIайланнасса эфирданул» хIакъиравусса цалвамур пикри.

– На хъинну гъирарай ялугьлай ура му иширах. ХьхьичIрами шиннардий хьусса эфирдайн бувну кIулли, республикалул хъунаманахьхьун буллалисса суаллу чIявусса бикIайшиву, агьали ми суаллу булаврия мюнпат бикIантIишиврий дакI дарцIуну бунутIий, ва хъунаманайн бу­ккайхту ххуйчулиннайсса да­хханашивуртту хъанан дикIайну тIий. Аьраличу ухьувкун, ттулмур буруккин бур СВО-лий гьуртту хъанахъиминнан ва миннал кулпатирттан ка-кумаг баврицIун бавхIусса.
Найбунува кIицI лаганна, ва ххуллий жула региондалий хъаннасса даву дуллай бушиву, хIатта Аьрасатнал царагу субъектрай Дагъусттаннай куннасса аякьа дакъашиву властирдал. Ва ххуллий жучIава ччарча шагьрурдал ва районнал хъуними ххуйну зий бур, ччарча властирдал органнал, школардал, вузирдал, жяматийсса ккураннал каялувчитал, дакIцIуцIаврий кумаг бан ччисса укунмасса инсантал. Республикалул бакIчи Сергей Меликовлул, ХIукуматрал хъунама Аьбдулмуслим Аьбдулмуслимовлул, Халкьуннал Мажлисрал вакилтурал шайсса къулагъас -аякьа дур, цащава шаймур буллай бур аьралитурангу, миннал кулпатирттангу. Жунма чIалай бур жулва цукун чувшиву ккаккан дуллалисса жагьилтал буссарив, миннал гьар кьинисса гьунардайну жува бух хьун къабацIайшиву, чара бакъа ххувшаву ласунтIишиву исват буллай бушиву. Вай укун кьянкьану бацIавугу хIисавравун лавсун, аьралитурал чIарав бацIаву – агьамсса давур. ДакI дарцIуну ура «тIайланнасса линия» нанисса ппурттуву медициналул кумаграл, социал иширттал, зузи кIанттурдал щаллу баврил, аьралитал аьркинмунил дузал баврил, ккаккан дурсса хIаллихшиннарду аьралитурал кулпатирттан дузал даврил ялувбацIаврил ма­съалартту гьаз бувантIишиврий. ВайннучIан гъансса цаймигу суаллу бикIантIишиврий. Сант дагьну дунура, дакIнийхтунусса барчаллагь тIий ура Дагъусттаннай СВО-лул гьурттучитурал ва миннал кулпатирттах ххуйсса аякьа душиврухлу республикалул хъуниминнахь, – увкунни Жамалу­ттин Амирхановлул.
ПатIимат Рамазанова