Август зурул 23-нний 30 инсан усса туристътурал группа Гъуниннал райондалийсса Ккарадах тIисса къуманива буккан къабюхълай ливчIун бивкIун бур. Хар-хавар бакъа дуниял дарщуну, цакуну бувксса аьтарттал му группалувасса 2 инсан лавсун лавгун ур.

Гава ссят бакъа хьусса туристътурах луглан бувккун бур Шамилкъалаллал, УнцIукIуллал районнал ПСС-рал зузалт ва укунмасса инсантал.
ХIакьинусса кьинигу вай инсантурах луглайнма бур.
Шиккува кIицI лаган, республикалул прокуратуралул ххал бигьлай буссар нигьачIаву ду­сса ппурттуву Гъуниннал райондалий Къарадагъ тIисса къуманив туристал буккан къа­хъанай личIаврин ци савав хьуну диркIссарив.
Региондалул МЧС-рал бусаврийн бувну, акъа хьусса ца турист ивкIун ур Москавлия­сса. Ванан диркIун дур оьрмулул 35 шин. Вама турист ур Санкт-Петербурглиясса, 37 шинал оьр­мулувусса.
Август зурул 25-ннийгу Гъуниннал ва Лаващиял райондалий гужну ларчIсса гъараллу сававну хьусса мугьалттал лавсун лавгун ур ялагу ххюя инсан.
АпатIрахьхьун биривсса инсантал лякъин кумагран лерххун дур МЧС-рал Ми-8 вертолет.
Мукунма мугьалттул бувгьу­сса инсантурах луглай бур Лаващиял райондалийсса Ххажалмащиял шяравугу. Шиккугу, август зурул 23-нний арс ва нину бу­сса «ВАЗ-2107» автомашина мугьалттул лавсун лавгун бур. Газель цуппа лявкъуну бур Къуппа т1исса шяравусса ламуя арх бакъасса кIанттай, шоферма утти­гу ля­къин увар.
МЧС-рал пресс-службалул баян бунни Гъуниннал райондалий ца инсаннал нурчIи ляркъушиву ва цу уссарив кIул уллай бушиву.
Ххассал бувултран Гъуниннал райондалий Къарадагъ къуманива 4 км архну лявкъуну ур ца цамагу инсан. Региондалул СК-рал исват бунни ва Санкт-Петербурглиясса турист ушиву. Москавлиясса туристнах уттигу луглайнма бур. Луглайнма бур Лаващиял райондалий бакъа хьусса шама цаймигу инсаннах.