Шяраваллил хозяйствалул ва промышленностьрал зузалал кьинилуцIун бавхIуну, Дагъусттаннал жагьилтурал министр Камил Саидовлул бувсунни Дагъусттаннал шяраваллил жагьилтуран Министерствалул дузал дуллалисса проектирдая.

Миннувасса ца дур «Земля традиций» тIисса агротурду. Республикалул аграр районнайх бувцуну, оьрчIаща ккаккан бюхълай бур аьрщараха, багъирдаха, ризкьилуха, къюмай тIутIуха зузисса куц. Вайннаща кIул хьун бюхълай бур фермертуращал, ттизаманнул агротехнологиярттащал, ишла дан бюхълай бур вай ххуллий зунсса, цала производство тIитIинсса каши. Программалул лагрулий бикIан тIий бур мастер-классру, экологиялул акциярду, кIулхьун тIий бур аьдатсса сянатирттащал. КIицI ларгсса проект дакъассагу, дикIантIиссар «Где родился, там и пригодился» тIисса республикалул шяраваллил жагьилтурал слет. Шикку хъунмур къулагъас дикIан тIий дур жагьилтурал цала бюхъу-бажар шяраваллил кIанттурдай ишла баврих: грантру духхаврих, ишбажаранчишиврух, шяраваллил хозяйствалуву ттизаманнул технологияртту ишла даврих, давурттай бавцIуну цала проектру щурущи даврих. Программалуву мукунма бур мастер-классру, агрохакатон, вакансиярттал ярмарка, иш бавчусса фермертуращалсса ва ишбажаранчитуращалсса хьунабакьавуртту.
– Жул мурад жагьилтуран шяраваллил кIанттурдай цала пишалул даража гьаз бан, сиптарду ва каширду ишла дан бюхъайшиву ккаккан бавур. Вай проектирдал ккаккан дан аьркинссар миннан ялуннай дузрайн дукканмур.