Апрельданул 25-нний хьунни Дагъусттаннал экономикалул лябуккулул цалий бацIаву цIакь даврил хIакъиравусса Оператив штабрал батIаву. Муний махъ лавхъунни республикалул цалчинма вице-премьер Руслан Аьлиевлул.
Мунал тIимунийну, Аьрасатнал ХIукуматрал гьарта-гьарза бувну бур хъузалтрацIунсса кабакьу. Му бур цIанасса ппурттуву хъуру дугьайни хъуннасса агьамшиву дусса иш. Федерал даражалий ккаккан дурну дур къама, ххяххангу бувну, багу баххансса харжлугърал дачIи лахъансса 10 млрд къурушру.
Ларгмур шиналгу шяраваллил хозяйствалул зузалтран хIаллихшинну дусса кредитру ласун ХIукуматрал итадаркьуну диркIссар 30 млрд къуруширттал. Гьашинугу паччахIлугърал бакIчинал тапшур бувну бур уттигу личIи дуван агросекторданун 150 млрд къуруширттал.
ХIукму хьуну бур ца поставщик итаврил, ва паччахIлугърал контрактру авансрай ласаврил хIакъираву. Мунийну бюхъантIий бур арцу бизнесрачIан ччяни ва гьарзану диян дуван ца чулуха, вамур чулуха тIурча – миннан оборотныйсса арцу дулун, миннал арцу банкирдаща къаласуншиврул.
Аьрасатнал ХIукуматрал хIукмулийну личIи дурну дур 4,3 млрд къуруширттал промышленностьрал лябуккулунсса регионнал фондирттал докапитализация дуваншиврул. Мунийну бюхъантIий бур предприятиярттаща ххира дакъасса кредитру ласун, сахла буван зузалт ва дуккан дайсса хъуслил лагрурду. Ми иширттан ишла дуван Дагъусттаннал ларсун дур 14,4 млн къуруширттал.
