Апрель зурул 5-нний МахIачкъалалив 54-мур школалий хьусса ифтарданийсса хъамаллувравух Дагъусттаннал спортрал министрнал хъиривчу Гайдарбек Гайдарбеков, Расул ХIамзатовлул цIанийсса Национал библиотекалул директорнал хъиривчу МахIаммадрасул МахIаммадрасулов, МахIачкъалаллал кIулшиву дулаврил управлениялул хъунаманал хъиривмур Зумруд Багъдуева, вава управлениялул отделлал каялувчитал Эльмира Мурадханова, Зулгижат Аьбдулжалилова, аьмсса кIулшиву дулаврил отделданул хъунаманал хъиривмур Ариза Аьбдуллаева, Шамхал поселокрал имам Амирхан МахIаммадов, «Ихлас» мизитрачIасса хъаннил мадрасалул хъунмур Сакинат Шагидова, «Ватан», ОАНО-рал директорнал хъиривчу ХIусайнов Арслан ва мукунма цаймигу бусравсса хъамал бия.
Мероприятие дайдирхьуна мубараксса Кьурандалул аятирттая. Хъамал, учительтал ва дуклаки оьрчIру барча буллалисса ихтилат бувна школалул директор Сапижат Мазаевал. МаркIачIан чаклил чIун гъан шайхту, школалийва хIадур бувсса столлах щябивкIуна зума ритан. «ЦачIу щябивкIун зума ритавриву барачатшивугу дуссар, куннал куннахсса ччаву, хIурматгу цIакь хъанахъиссар. Жунгу, школалул коллективран, ца кулпат кунма, ца ссупралух ккуркки лаган ччай бия. Барчаллагьрай бура жущалва щябикIан бувкIсса бусравсса хъамаллурайнгу.
РувхIанийсса ххуттай цIакьну бацIарча, жулва наслулуцIун, ялун нанисса никирацIун Аллагьналгу кабакьинтIиссар. ЯлунчIингу ифтарду дуллансса цIуллушиву дулуннав цинявннахьхьун!, – увкуна Сапижат Мазаевал. Рамазан зурул барачат гьарцаннайн бияннав, иман цIакь хьуннав тIисса, циняв бусурманнан Заннал цIими ва барачат чIа тIисса дуаьрду дурна хъамаллуралгу. Ва жула аслансса Виричувнал, НурмахIаммад ХIажимахIаммадовлул, яхIлувсса нину Сапижат Мазаева каялувшиву дуллалисса школалийгу барачат ликканнав!
ПатIимат Рамазанова
