Аьдатравун дагьсса куццуй, апрельданул 1-нний Аьрасатнаву дайдирхьунни интнил призыв. Щала билаятрай кунна, ва иширан хас дурсса мероприятияртту най дур Лакрал райондалийгу.

Итникьини хьунни призыврал комиссиялул аьралуннаву къуллугъ бан тIайла буккансса оьрчIру язи бугьаврил ялувсса ирглийсса мероприятие.
Ва иширал ялув авцIуну ур райондалул бакIчи Юсуп МахIаммадов. Ванал кIицI лавгуна, Аьрасатнал Обороналул министерствалул баян бувсса куццуй, аьралуннаву къуллугъ буллан нанисса оьрчIру хасъсса аьралий операция нанисса кIанайн тIайла къабуккантIишиву. Гьашину Лакрал ва Ккуллал районнал военкоматрал аьралуннаву къуллугъ бан тIайла уккан ккаккан увну ур 40 оьрчI. Цалчин наниминнавух Лакрал райондалия гьан тIий ур 5 призывник.
Аьралий комиссариатрал зузалтрал бусаврийн бувну, повесткарду ларсъсса цинявппа призывниктал ккаккан дурсса чIумал букIлай бур медкомиссия буван. Призыврал кампаниялул мероприятияртту най дур закондалул тIалавшиннардацIун даркьуну, пландалий ккаккан дурсса кьаралданий.

Зулайхат Тахакьаева