2018 шинал байбивхьуну, Шахьуйннал шяраву буллай буссар цIусса кIизивулийсса мизит. Уттигъанну бивхьунни мизитрал чIавахьулттив.
Ларгсса шинал щаллу хьуссар чарилми давуртту, бувну къуртал бувссар чIиртту, дирхьуссар магъи. Мизитрал имам МахIаммад-хIажи Сагидовлул бусласимунийн бувну, магъи дирхьуну махъ гихуннайми давуртту дуллан цукссагу бигьа хьуну дур.

– Магъи дакъасса чIумал аьркинсса стройматериал ласун хъанай дакъая, ларсмур гъаралу ва марххалттанилу личIлай дия. Аллагьнайн щукру, щаллу хьунни магъигу. Ва дувангу ишла дурссар хъинну ххуйсса мах, сайки 50 шинай диянтIисса. Мах ласласисса фирмалий жун багьагу ялавай бунни, яла дуртмур чирину дацIаннав, – тIий ур МахIаммад-хIажи.

БакIрайва мизит баврил сип­тачи хьуссагу МахIаммад-хIажи цувари. Мизитрал гьанугу МахIаммад-хIажинал ва ванал арснал Арсланнулли бивхьусса. Гай шиннардий хъунмурчIин Кострома шагьрулий ялапар хъанай, Лаккуйн увкIсса МахIаммадлущалсса ихтилатраву шяраву къатри дуллай зузисса яруссаннал миллатраясса усттартал махIаттал хъанай бивкIун бур, кьасса ххуйсса кIанай дирхьусса шяраву шиккувасса инсанталгу, ялун бувкIмигу чак буван буххансса мизит бакъашиврий. Ваниннингу мизит баврил ялув пикрирду ук-тук хъанай бивкIсса МахIаммад-хIажи ва ихтилатрал гьуз учин увну ур хъун­масса чирилунсса даву дуллай айишаврийн. ВанацIун, ванал арснацIун шяраваллил жагьилтуралгу (Аьбдул Аьлиевлуя, Зураб Аьлиевлуя тIайла хьуну) кабавкьуну, гихуннай цинявнналагу архIал дуллан бивкIссар ва ххишала дакъа аьркинсса ва мюнпатрансса даву. Вайннал хъирив бавчуссар шяраваллил махъсса агьалигу. Шайнал шайсса кумаг буллай, лагма лавгун, анаварну къахьурчангу, хIалли-хIаллих тIий най, вана ла­хъшиврий ва утташиврий итталун дагьансса мизитрансса диялсса къатри хьуну. ХIазран бакъар учайсса дуллалимуницIун Занналгу кабакьайссар куну.

– Аллагьнайн щукру, шяраваллил жяматрал, дустурал кумаг бувунни, буллайгу бур. Мизит буллай байбивхьуния шийннай, чIун-чIумуй дуллай, хьуссар чIярусса субботникру, вайннул лагрулийгу диялсса давуртту дуван бювхъунни. Су­бботникирттай, шяраваллил жагьилтурацIун, цайми щархъаямигу гьуртту шайссар, мукунма лакрал районнал имамталгу бувкIссар кумагиран. Ххарира Хъунасса Заннал ттухьхьунна укунсса давривух хIала уххансса каши дулаврихлу. Мизитраву, чара бакъа буван аьркинсса чак баврицIун, жяматран мюнпатрансса цайми давуртту дуллансса ниятгу дуссар. Аллагьнал кумаграйну ва даву бакIуйн дуккан дуван хьунссар тIисса хьул-умуд бур, ин ша Аллагь, – буслай ур имам.

Мизитрал проект щаллу дурну дур цIа дурксса архитектор, Аьрасатнал язисса ттурша архитекторнал сияхIраву цалмур цIагу дусса Камил ЦунтIаевлул. Ковидрал пандемиялийн бувну, мизит буллансса усттартал къаляхълай, давуртту кIира шинай дарцIуну диркIссар. Ххуйсса усттартал лякъингу Камиллул цалва кумаг бувссар.
Мизит цуппагу буллалиссар бигьа дакъасса кьяйдалий, форматрай, шанма-мукьва журасса чару ишла буллай.

МизитрацIун дархIуну ларг­сса шинал дуван бювхъусса давурттаву кIицI лаган бюхъанссар кIива фронтонгу, ца – шяраваллил чулухсса, ца – Гъази-Гъумучиял чулухсса. Минарагу 5 метралул лахъ бувссар. Ларгсса шинал мизит буван харж дурну дур 2 миллион ва 223 азарда къуруш арцул.

Дулланмур ттигу къачанни. Гьашину зунссар чани буцавриха, щаллу дулланссар гъилисса пол, ялагу ка ва арцу хъирив лармур. ЦIанасса чIумал ци дуллангу къабигьар. Хаснура стройматериал диркIссаннуяр цимилгу ххира хьусса чIумал къабигьар къатри дуллан. Амма, кIиннал кьун бутайсса кунма, циняв цачIун хьурча, дуван къашайсса зат дакъассар. Аллагьнаясса цайвасса цIимилун, чирилун мизит буллалисса давурттавух хIала бухлахимигу чан бакъар, шайнал арцуйну, арцуйну къашайнал – давурттайну. Къачанни арцуйнугу, давурттайнугу кумаг буллалимигу. Ларгсса шинал Рамазан зуруй баян бувссар мизит бувансса арцу датIлатIишиву. Гьашинугу, мубараксса Рамазан зурул ливчIсса ацIвагу гьантлул дянив, баян бувну буссар мизитрансса арцу датIлатIишиву. Бувсса чIивисса бухьурчангу хъинбала цукссагу хъунма хъанахъисса, Аллагьнаясса цIими, чири ххисса ва зуруй ва давривух гьуртту хъанахъисса лакгу, цайми миллатирттал инсанталгу чан бакъар.

– Мизит буллалисса давурттавухгу, Рамазан зуруй мизитрансса арцу датIавривухгу гьуртту шай хъинну чIявусса инсантал, жула лакрал щархъал фондру, Аьрасатнал личIи-личIисса регионнаясса мусульман. ЦIа дурксса спортсментурал, ХIабиб НурмахIаммадовлул, Ислам МахIачевлул, Тимур Валиевлул, Усттар МахIаммадовлул ва цайминнал, соцсетирдайсса цалла-цалла страничкардай дишай мизит буллалисса давривух гьуртту шаврийнсса оьвчаврищалсса видео-ролик,– буслай ур шяраваллил мизитрал имамнал информациялул даврил чулуха­сса кумагчи Аьбдул Аьлиев.

Шиккува кIицI лаган, шяраву мизит буллай байбишаврил Аьбдул хIаласса жагьилтуравун гьавас бувтун, вайннал, сакин бувну шяраваллил фондгу, жяматийсса советгу, куннил хъирив кув дуллай байбивхьуссар хъин-хъинсса давуртту. Шяраву дан-дитанмунил хIисав-сан, план дуллай, чIун-чIумуй шайссар фондрал ва советрал батIавуртту. Мизит буллай байбишаву барачат хьуну, жагьилтурал аькьлугу, гужгу, оьрмулул биялминнал аькьилшивугу цачIуну, щар утта ду­ккаврил бущи анавар бувкссар.
Шяраваллил жямат, фондрал вакилтал хъунмасса барчаллагьрай бур ва мубараксса ишираву цала чIарав бацIлацIиминнайн, ка кIидахIлахIиминнайн, Аьли­хIажи Ахъушинскийл фонд­райн, «Бурхан» тIисса ихIсандалул фондрайн.
Мизит щаллу хьуну, шива акбарданул чIу баллалисса, чак буван шивун инсантал нанисса кьини ччяни дучIаннав. Дуниял паракьат хьуннав. Амин.

Бадрижамал Аьлиева