Поэзиялул театрдануву хьунни «Калейдоскоп театральной жизни Дагестана. 1920–2025 г.» тIисса рецензиярттал луттирал презентация.

Му итабавкьуну бур театровед ва критик Наталия Гъазиевал. Лу дунияллийн бувккун бур маданиятрал ва магьирлугърал оьрмулуву миллатирттал театрдал агьамшиву дусса творческий проектирдан кабакьу буллалисса Аьрасатнал президентнал грантрацIух.

Ва хъинну хъирив лавсса хъунмасса захIмат чулийн буккаврил ялув Наталия Гъазиева зий бивкIун бур шанна шинал мутталий. Авторнал цила луттиравун бавтIун бур библиотекарттал фондирттаву ххилтIу бувсса архиврду, кказит-журналлал чIапIай яхьумур, хъахъи ларгсса программартту, нажагь дакъа къаяхьусса суратру. Театрдал даврия бусласисса макьаларттавагу, артистътурал, режиссертурал, художниктурал пишакаршиврун кьимат бишлашисса рецензиярттавагу аьлтту хъанай бур дагъусттаннал сахIналул ттуршра шинал тарих – 1920 шиннардий цала хIарачатрацIух бивхьусса спектакллая 2025 шинал бивхьусса хIакьинусса кьинилуцIун бавкьусса премьерарттайн бияннин. Луттираву чIалай бур цукун баххана хъанай бивкIссарив театрданул маз, ттуршукулул манзилданий цукун хIасул хьуссарив миллатирттал театрдал ляличIисса хатI.
Презентациялийн бувкIун бия авторнал даврил уртакьтал, Дагъусттаннал театрал ккурандалул вакилтал, режиссертал, актертал ва магьирлугъ ххирами.

Наталия Гъазиевахь Дагъусттаннал театрдал летопись чичаврихлу барчаллагь тIутIиминнавух бия Аьрасатнал магьирлугърал бусравсса ишккакку Качар ХIусайнаева, Аьрасатнал лайкь хьусса артист Аслан МахIаммадов, республикалул гьарцагу театрданущал уртакьну зузисса Дагъусттаннал халкьуннал художник Ибрагьим-Халил Супиянов, «Дагестан» журналданул хъунама редактор Марат ХIажиев.
«Ва бакъар, анжагъ, рецензиярттал сборник, ва аьпари. Наталия Кьурбановнал утта дуккан дурунни хъамаритала хьусса цIарду, дакIнийн бивчунни спектакллу. Ва жуж хъанай бур ялун нанисса актертурал ва режиссертурал чул бищунсса гьануну», – увкунни Аслан МахIаммадовлул.

Артистътал ва режиссертал дакIнийн бичлай бия миллатирттал театрдал архсса зунттавунсса гастроллал аьрххирду, реквизитрагу дакъа дунияллийн буккарчагу, бусалардаву личIан нясив хьусса спектакллу. Цинявппа, ца зумату кунма, кIицI лаглай бия «Калейдоскоп театральной жизни Дагестана» хъанай бушиву багьа бакъасса театрал магьирлугърал энциклопедия. Мероприятиялийн увкIсса гьарцаннан авторнал пишкаш бунни жуж, бувсунни чIал къавхьуну му биян бантIий бушиву республикалул библиотекарттал фондирттавун, магьирлугърал дуккаврил идарарттавун.