Июньдалул 16-нний Поэзиялул театрдануву хьунни Дагъусттаннал культуралул лайкь хьусса зузала, шаэр, Дагъусттаннал Чичултрал союзрал председательнал хъиривчу ва Лакрал литературалул секциялул хъунама Супиян Оьмаровлул творчествалул вечер.
Зал щапI куну бувцIуну бия, инсаннал ша бизансса кIану бакъа, лув бишай кIантту биривну тIайлабацIу хьуми фоейлуву щябивкIун бия. Бия бавцIунува тамаша бувссагу. Поэззиялул театрданул директор Елена Гьаруновал кIицI лавгуна укун бувцIусса зал шаэрнансса яла бусравмур награда хъанахъишиву.
Программа усттарну дачин дурну бия Поэзиялул театрданул директорнал хъиривмур, Дагъусттаннал магьирлугърал лайкь хьусса зузала, сценарист Ариза Батырова ва цува Супиян Оьмаров.
Дагъусттаннал Чичултрал союзрал правлениялул председатель Марина АхIмадовал-Колюбакинал кIицI лавгуна Супиян Чичултрал союзрайн зун учIайхту, ванал цIаницIун дархIусса тамансса хьхьичIуннайшивуртту хьушиву ва Лакрал чичултрал секция ца яла чялишну гьуртту шаймур ва куннащал кув бавкьумур бушиву, вагу каялувчинал хIарачат бушиву.
Бувккуна ванил цила оьрус мазрайн таржума бувсса Супияннул арснан хас бувсса шеъригу.
Дагъусттаннал парламентрал депутат, Законналсса ва кIанттул цилакаялувшиврул ва паччахIлугърал строительствалул къайгъурдалсса буллалисса комитетрал каялувчи Артур Исрапиловлул кIицI лавгуна, буттал аьрщарахсса ва инсантурахсса ччаврил видурцIусса дакIнива къявхъ кусса шеърирду шаэрнал гьунар чIалачIи буллалисса бушиву. Творчествалул личность, шаэр хIисаврайгу Супияннул хIурмат бушиву пишалул уртакьтурал ва буккултрал дянив.
Республикалул шяраваллил хозяйствалул министр (врио) Шамил Рамазановнулгу кIицI лавгуна, Супиян цана ччянива кIулшиву, ванал бюхъу-гьунарду чIявусса бушиву, даврил агьамсса аьрххи бунува, цащава ванал вечерданул чIарах уккан къавхьушиву.
«Дагестанский аул» заповедникрал директор Зумруд Сулаймановал бувсуна, чIярусса шиннардий цивппа ца даврий зий бивкIшиву, комсомолданул активистътурал дянивгу Супиян ца яла ябацIанма ивкIшиву.
«Цайнна тапшур дурсса даву дюхъан дурну дувайсса, жаваблушинна дусса, архIал зузиминнаягу тIалавшинна дусса икIайва. Комсомолданул даврий каялувшиву дуллалиминнан инсантуращал маз лякъин, агьалинал дакIниймур ласун кIулну бикIан аьркинссар, сийлий икIан аьркинссар. Супияннаву ми циняр хасиятру дия. Музыкалул чулуха итххявхсса ушиврийнугу учIи лякъайва, къавтIун изан аьркинний ивзуну, балай учин багьний увкуну культуралул программалул хъаргу лахъайва. Ванан цанмавагу къакIулну бикIан бюхъайссар, цува комсомолданул цалчинма секретарьну рекомендовать увну ивкIшиву, амма комсомол лавкьуна, ишру цамур куццуй багьуна. Жу цачIу зий бивкIссару жагьилтурал иширтталсса буллайгу, шиккугу ванал цала потенциал, бюхъу-хIарачат ккаккан бувссар», – увкуна ванил.
Лакрал райондалул бакIчи Зураб Куччаевлул кIицI лавгуна, Супиян мудангу чялишну хIала уххайшиву лакрал оьрмулул иширттавух ва хасну Лакрал райондалул мюнпатрансса давурттавух. Ялун нанисса ник рувхIанийсса ххазинарду хьхьичIунну тарбия буван бутIа бишаврихлу ва ниттил маз ябан, гьаз буван дуллалисса давурттахлу барчаллагь тIий, райондалул администрациялул цIанияту буллуна Барчаллагьрал чагъаргу.
Дагъусттаннал Жяматийсса палаталул хъунаманал цалчинма хъиривчу Ссапарбаг Аьбдуллаевлул бувсуна Супияннул хъунмасса кумаг бувшиву МахIачкъалалив лингвист-профессор Ися Аьбдуллаевлул цIанийсса Лакку маз лахьхьин буллалисса центр цил багьайкун хIадур буван. КIицI лавгуна ванал инсаншиврийсса къуццу тIутIаву, агьалинан цаятува мюнпат бикIансса къистташиву.
Дагъусттаннал бакIчинал Бугьараминнал советрал председательнал цалчинма хъиривчу, публицист Шалласу Шалласуевлул, халкьуннал чичу Мирза Давыдовлул ва халкьуннал шаэр ПатIимат Рамазановал бувсуна лях-карах ванал назмурдугу ккалай, Супияннул творчествалул хьхьичIуннайшивурттая. Вайннал кIицI лавгуна, Супияннул творчество видурцIуну душиву буттал улклухсса, ниттихсса, кулпатрахсса, уссу-ссуннахсса ччаврил ва адав-инсапрал, ххуйшиврул ва хъиншиврул. Шаэр барча уллалицири сайки ца зумату кунма вай хасиятирттай чIурчIав дуллай бия. КIицI лаглай бия ялун ккаккан кIукIлусса чIаларчангу, Супияннул багьайний багьайкун махъ учайшиврий, захIматсса чIуннардий кьянкьашиву ккаккан дуршиврий, мукунсса ца мутта хьушиву 1999 шинал Чачаннал аьрщарая Дагъусттаннайн террористътал ххявхсса ппурттуву, Супиян интербригада хIасул бувну Ккуллал райондалия ярагъ кIунттил бувгьуминнащал кьини лахълай ивкIшиврий.
Шаэрнал оьрмулия ва творчествалия махъругу лавхъуну, ванал назмурду дагъусттан миллатирттал мазурдийн таржума дурну дурккуна Чичултрал союзрал секциярдал каялувчитурал: халкьуннал шаэр Багьауттин Аджиевлул (къумукь мазрай), Максим Аьлимовлул (лазгири мазрай), Муса БахIаммадовлул ( даргири мазрай), ХIамзат Изуттиновлул (яру мазрай), ХIусайн АьбдурахIмановлул (табасаран мазрай), Гульфира Бекмуратовал (нугъайнал мазрай). Авторнал цалагу дурккуна цIусса назмурду.
Вара мероприятиялул лагрулий Супияннул «Абадлийсса тирхханну» тIисса луттирал презентациягу хьуна. Ва луттиравасса назмурду дурккуна дуклаки оьрчIал Даниял АхIмадовлул, Умлайла МахIадовал, Ясмина ва Сахават Оьмаровхъал ва Лакку мазрал центрданул каялувчи ПатIимат Аьлиевал учениктурал. АхIмад-Хан Султаннун хас бувсса шеъри сахIналул проекторданий бувккуна ХIажимуса Мусаевлулгу. Ва «Илчилул» пасихIну назмурду буккаврил конкурсрай хасъсса бахшишран лайкь хьуссия.
Мероприятие нанисса мутталий проекторданий ххал дуллай дия шаэрнал оьрмулул ва творчествалул лахIзардал суратру ва видеортту. Ванал буттал шяраваллил, Цалчинмур ЦIувкIуллал, ккаккиярттая ва хьхьичIуннайшивурттая бусласисса. Шиккува кIицI лаганна Азиза Батыровал лях-карах буллалисса суаллахьхьунгу жаваб дуллай ивкIшиву Супиян.
Поэзиялул вечер музыка бакъасса дикIайхрав?! Супияннул мукъурттийсса ва ванан ххирасса балайрду увкуна Дагъусттаннал халкьуннал артистътурал: Лариса ХIажиевал, АхIмад АхIмадовлул, Луиза Шахдиловал, Жанна Кьурбановал. Бувккуна сахIналийн бавтIцири ххари буван балайчи Ульзана Макьсудова ва музыкант, композитор Амрит ХIусайнаевгу.
Шиккува кIицI лаганна, цала поэззиялуву хъамитайпалул хIурмат бюхттулну бушиву ккаккан буллалисса Супияннул цавагу хъамитайпа тIутIал кацI къабуллуну къаитабавкьушиву. Шеърирду бувккусса оьрчIангу ссайгъатру хIадур бувну бивкIшиву.
Программалул ахирданий композитор Оьмар МахIадовлул ва ванал арснал душнил Умалайлал увкуна «Ттул лакку маз» тIисса балай.
Гъан-маччацириннал ва Цалчинмур ЦIувкIуллал жяматрал цIания бавтIцириннахь барчаллагь увкуна шаэрнал маччачу, профессор, ЦIувкIуллал Жяматийсса советрал хъунама МахIаммадбаг ХIусайхановлул. Ванал кIицI лавгуна, Супиян шяраваллил Жяматийсса советрал ца яла чялишма член ушивугу, жяматрал оьрмулувусса ккалли дансса гьарцагу даврил чIаравгу ацIайшиву.
Тамашачитурал тавакъюлийн бувну, мандолиналухун балай увкунни цала Супияннулгу. Тасса-танийнгу ва сахIналия итакъаакьлай гурсса хъатру ришлай бия бавтIцири. ЧIявуя ванащал сурат рищун ччимигу. Вана укун мякьнува, щакъаливххуна ппив хьуна та хьхьуну Поэзиялул театрданувун бавтIсса агьлу. БатIцириннал географиягу гьартасса бия: Ккуллал райондалийсса шяраваллава, мукунма шаэрнал буттал шярава, Цалчинмур ЦIувкIрату, бувкIссагу тамансса бия. Ттунма кIулцириннаву Бакуя бувкIун бия шаэр ПатIимат Штанчаева, Тула шагьрулия литература ххуйну кIулсса ва ххирасса хIакин Зарема Аьлиева.
Шаэрнал вечер – му анжагъ ганал назмурдаясса ва миннул биян бувсса асардаясса ихтилат бакъар. Лакрал тарихраясса, литературалиясса, культуралиясса, гьунттийсса кьинилиясса ихтилатри. Мукунсса даражалий ларгунни Супиян Оьмаровлул вечергу.
ПатIимат Рамазанова
