Щала билаятрай Аьрасатнал Халкьуннал мазурдил кьини, Дагъусттаннал халкьуннал шаэр Расул ХIамзатовлун 103 шин хъанахъисса сентябрьданул 8-нний, ванал гьаттай тIутIив дирхьунни чIявусса агьалинал.

Вайннавух бия республикалул бакIчи (врио) Федор Щукин, ХIукуматрал хъунама МахIаммад Рамазанов, Халкьуннал Мажлисрал хъунама Заур Аскандаров, Аьрасатнал Чичултрал союзрал каялувчи Николай Иванов, Дагъусттаннал Чичултрал созрал хъунмур Марина АхIмадова-Колюбакина, шаэрнал душ, Изобразительный искусствардал музейрал директор СалихIат ХIамзатова ва цаймигу бусравсса хъамал.

Федор Щукиннул кIицI лавгунни Расул ХIамзатов увсса кьини щалагу билаятрай байран-кьинину ккаккаву агьамсса ва кьиматрайсса иш бушиву ва цува шаэргу, хIакьсса патриот ушаврицIун, цайми миллатирттал культуралул ва аьдатирттал хIурмат бусса инсан ивкIшиву, шаэрнал щала творчествагу ­аькьилшиврул, хъиншиврул ва Ватандалухсса ччаврил ца хъунмасса цасса лу хъанахъишиву.

Вара кьини Федор Щукин ивунни Расул ХIамзатов яхъанай ивкIсса къатравунгу. Ванал кIицI лавгунни, СССР-данул халкьуннал архитектор Аьбдулла АхIмадовлул проектрай дурну диркIсса шаэрнал къатри буниялттунгу музейрал кIанттайсса душиву ва шаэрнал кабинет, библиотека, гьарзат та чIумул суратру итталу дацIан дуллалисса душиву. Бувсунни шаэрнал рувхIанийсса ирс-ххазина ябаврил ххуллий шайсса кумаг бувантIишивугу.