Лакрал районнай нажагьссавагу бакъахьунссар ва къакIулсса. Чансса бухьунссар республикалийгу Даниял Магьдиевлул цIа, бюхттулсса чIуний бюхханну ванал бувсса ихтилат къабавсса. ОьрчIан кIулшивуртту дулаврил ва ми тарбия баврил ххуллий Даниял Магьдиевлул хъунмасса захIмат бивхьуссар.
Школалий дуклакисса шиннардил гьарица инсаннал оьрмулуву личIи-личIисса асарду кьабитай. ОьрчIан школалийсса шинну тIааьнну дакIний личIан хъунмасса бияла учительнахь бикIай. Школалийсса шиннардил кьабивтунни ттул оьрмулувугу яргсса, дакIний личIансса лахIзарду.
1974-ку шинал институт къуртал бувсса жагьилсса учитель школалий зун буттал шяравун Ккурклив увкIсса чIумал, жу байбихьулул классру къуртал бувсса оьрчIру бияв. Дарсру дайдишиннинма бавуна жула класс Даниял МахIаммадаьлиевичлухьхьун буллалиссар тIисса хавар.
Мунияр шихунмай, 4-мур классрава байбивхьуну, школа къуртал баннин жу архIал бивкIссару. Ччяни ххира хьуна жун дарсирдах гъира бутлатисса, гьавас бусса, оьрчIах ччаву дусса, миннащал маз лякъин кIулсса учитель.
Жул классгу, Даниял МахIаммадаьлиевичгу куннайн кув бакIрайн багьавриву жунгу, мунангу бахтти хьуна. Зун гъира-шавкь дусса учительгу, кIулшивуртту ласун гъира бусса, ххуйну дуклакисса оьрчIругу. Жул классраву чIявуми учительтурал оьрчIру бия, цIубутIуй мяйя отличник уссия.
Арулла шинал лажиндарай Даниял МахIаммадаьлиевичлул каялувшиннаралу дурссар цикссагу ххаллилсса мероприятияртту: литературалул вечерду, военно-патриотический композицияртту, викторинарду, экскурсиярду. Шиккува кIицI лаган, «БивкIу бакъасса полк» акция жул школалияр дайдирхьусса, цурдагу Данияллул сипталий. Билаятрай му махъ дуллан бивкIунни. Данияллул цала сипталий ва сакиншиннарай бувсса, диялсса экспонатру дусса Аьралий музейраву хIакьинусса кьинигу яхьуну бур му акциялул суратирттащалсса танийвасса альбомру. Акция Ккурккуллал школалий аьдатравун дагьну дуссар. Данияллул сакиншиннарай шяраву ляличIинура лахъа-хъунну кIицI лагайссия Ххувшаврил байран.
Шяраваллил клубрал ва школалул сахIналий жу ккаккан бувссия А.Фадеевлул «Молодая гвардия», Н.Островскийл «Как закалялась сталь» романнавасса парчри. Цал учительну, махъ директорнугу зузисса шиннардий Даниял МахIаммадаьлиевичлул хъуннасса даву дурссар оьрчIру Ватан ххирану тарбия баврил ххуллий.
Ванал сипталий жу ччя-ччяни хьунабакьайссияв, дусшиву дайссия цайми школардал дуклаки оьрчIащал ва учительтуращал. Мукунсса дакIний личIансса хьунабакьавуртту хьуссар ТIюхчардал, ЧIухърал, Мияйннал ва цаймигу школардащал. Цаппарассаннащалсса дусшиву уттинингу яхьуну дур.
Москавуллал школардай ххуйну дуклакисса оьрчIру-душру шяравун бувкIукун, Даниял МахIаммадаьлиевичлул жул дянив кIулшивурттал бяст-ччал байва, жу тайннаяр махъун къабагьувкун, хъинну ххаригу шайва. Школа къуртал бувну лавгун махъгу, Даниял МахIаммадаьлиевич, жу цума ци дуллай урив, ци кумаг аьркинну бурив цIухху-бусу буллай, аякьа дуллан икIайва. Ххари шайва жул тIайлабацIурттая ва хьхьичIуннайшивурттая. Каникуллай шяравун бувкIсса чIумал жущал хьунабакьавуртту дайва. Оьвчайва дуклаки оьрчIащал хьунабакьин, ихтилат бан. Даниял Магьдиевлун кIула оьрчIавун цукун гъира бутанссарив. Ва ия хIакьсса педагог, психолог. Университет къуртал бувсса чIумал ттун Ххюлуссуннал школалийн направление дуллуна. Му кIул хьуну, таний школалул директорсса Даниял МахIаммадаьлиевичлул, на ттула ученица чункIуй гьан къабитайссар тIий, ректорнайн увккун, Ккурккуллал школалун филолог аьркинну ур тIий (хIатта кIикку биялсса филологтал бунугу), на цачIава зун бувцунав. Мукьра-ххюра шин дурссар Ккурккуллал школалий зий. Цаннан ца бувчIлай, архIал цикссагу ххаллилсса мероприятияртту ми шиннардийгу дурссар. Учитель хIисаврайгу, каялувчи хIисаврайгу Данияллул агьамсса кIану бувгьуссар ттул оьрмулул ххуллий.
Даниял ия инсаншиврул бутIа буллусса, дакI хъинсса, чумартсса, цаманал буруккин кIибачIин, дакIниймур лаласун анавар уккайсса инсан. Мюхтажнан кумаг байва, кумаг аьркиннал чIарав ацIайва. «Къа» тIисса зат ванан къакIула, «къабанна, къахьунссар» тIисса махъру ваная щинчIав бавшиву къакIулли. Цалагу учайва, закондалул ххуттава личирчагу, инсаннал тавакъю щаллу къабан къашай куну. Райондалия ванахь бикIайва, вил му школа безразмерныйсса бурив тIий. Цамур нагрузка дакъахьурча, цала ссятирдая кьуркьуну дулайва. Укунсса ия жул Даниял МахIаммадаьлиевич. Ваная бусларча, бусансса чIявусса лякъинссар.
Данияллул хIурмат хъунмасса бия райондалийгу, республикалийгу.
Ва ия мукъул усттар, оратор. ХъатIай-хъиншивурттай усттарну тямадашиву дурну, гьаз дайва мажлисрал сий.
КъадикIайва ванал къушлий хъамал бакъасса чIун. Шяравун увкIма кьамул ангу, тIайла уккангу, иш багьний маслихIат бангу акъа чара бакъасса, шяраваллил ттарцI хьусса инсан ия.
Данияллул цIа абадлий дакIний дикIантIиссар ваначIа дуклай, зий бивкIминнан, шяраваллил жяматран, дустуран, даврил уртакьтуран.
Биографиялул кутIасса справка
Увну ур 1946-ку шинал январь зурул 3-нний Ккурккуллал шяраву, чIявусса оьрчIру бусса МахIаммадаьлил ва ХIабибатлул кулпатраву.
1965-ку шинал къуртал бувну бур Ккурккуллал дянивмур даражалул школа. 1969-ку шинал увххун, 1971-ку шинал къуртал бувну бур Дагъусттаннал педагогический институтрал филологиялул факультет.
1974-1977-ку шиннардий зий ивкIун ур Ккурккуллал школалий оьрус мазрал ва литературалул учительну, 1977-1982-ку шиннардий вава школалул завучну. 1982-2017-ку шиннардий, 35 шинал лажиндарай, школалул директоршиву дурну дур. 2017-ку шиная айивхьуну, архIала цала сакин бувсса Аьралуннал ва ЗахIматрал савлугърал музейрал директорнугу ивкIун ур.
Даниял Магьдиев ур Дагъусттаннал лайкь хьусса учитель, Дагъусттаннал ва Аьрасатнал Халкьуннан кIулшивуртту дулаврил отличник.
1991-ку шинал кьамул увну ур Аьрасатнал Чичултрал союзравун.
1996-ку шинал лайкьну дурурччуну дур педагогикалул элмурдал кандидат хьунсса диссертация. Мукьра шинай лув-ялув (1998-2001) ларсун дур «Шинал директор» тIисса бусравсса цIа.
Данияллул лайкь дурну дур Жуковлул, Лермонтовлул, Шолоховлул, Пушкиннул медаллу. Ва ия лавайсса даражалул учитель. Дагъусттаннал бакIчиначIасса Хъунисриннал советрал член.
Даниял аьпалухьхьун лавгунни 2020-ку шинал декабрь зурул 23-нний.
Андриана Аьбдуллаева
