Декабрьданул 30-нний Лакрал театрдануву хьунни «Ччитул къатта» тIисса оьрчIансса музыкалул спектакльданул оьрус мазрайсса ва лакку мазрайсса кIива премьера.
Ччянива оьрчIан ххира хьусса С. Маршаклул къудурсса ччитуясса магьа лакку мазрайн бувцуну бур Дагъусттаннал халкьуннал шаэр, журналист ПатIимат Рамазановал.
Магьлул гьанулийсса спектакльданул оьрчIан кумаг буллай бур личIи бан дакI тIайласса дустал хаинминная, къаччан бикIан бувма багъишла итан, зарал биян бувминнал ялтту бучIан, оьрчIру рахIму-цIими буну, дакIнил хъиншиву ядурну, аьмал марцIну, лагма-ялттунан ка-кумаг бан мюхтажну тарбия бан.
Усттарну Ччитул роль дургьуну бия Дагъусттаннал лайкь хьусса артистка Зинаида Чавтараева. Ажарттул роль дургьуну бия Дагъусттаннал халкьуннал артистка Луиза Шагьдилова. Спектакльдануву ялагу рольлу дургьуну бия Ислам МахIаммадов, Малик Кьурбанов (Ччиту Василий), Руслан Ларин, Жанет Генджеева (магьа бусу), Жамиля Закарьяева, Изумруд МахIаллиева (ччитул оьрчIру), Сафира Сулайманова (ЦIуку), Мурад АьбдурахIманов (Кьяца).
Зулайхат Тахакьаева