Ххувшаврил байрандалул кьини, гьар шинах кунма, кIюрххила чIявусса агьлу бавтIун бия ЦIуссалакрал райондалул кюрттарайн, ЦIуссалакрал шяравусса хъунмайданнив. Ватан дуручлай жанну кьурван дурсса вирттаврал аьпа учин, бусрав-барчаллагьрай тIутIив дишин фронтовиктурансса гьайкалданучIа.
Райондалул бакIчи МахIаммад-ХIажи Айдиевлул агьали барча буллалисса ихтилатраву кIицI лавгунни, циксса шинну гьарчагу, та бала-мусиватсса дяъвилул къюву лагь къархьушиву, тарихрал дарсру хъамаритан къабучIишиву, сайки цавагу кулпат бакъашиву райондалий дяъвилул щавщи къабивсса.
– Мяйжаннугу ххирану дарцIуссар жунна бюхттулсса Ххувшаву, дяъвилия зана къавхьусса ва дяъвилия махъгу билаят ччаннай бацIан буллай бивкIсса, жунма ххуйсса оьрму дузал буллай бивкIсса вирттаврал аьпалул хIурмат райондалийцириннал дакIурдиву лахъну буссар ва бикIантIиссар.
Ва хIурмат жува ялун нанисса никирал дакIурдивугу кьабитантIиссар, кьабитаврил ххуллийсса давуртту дуллайгу буссару, – увкунни Айдиевлул. ДакIнийн бутанну ЦIуссалакрал райондалий хIакьину сагъну ушиву увагу 1 фронтовик, Аьлил Буттаев. Дакьин дурну, цIу дуккан дурсса дяъвилул гьайкалдануцI гьурттучитурал, райондалул делегациялул дирхьунни тIутIив. Вара кьини вава делегация хIаласса агьалинал тIутIив дирхьунни 1999 шинал сентябрь зуруй район ххассал дуллай жанну дуллусса Вирттаврал гьайкалдануцIгу.
Му чIумалгу жула вирттаврал ва агьалинал ккаккан бувссар, иш багьарча, Ватан дуруччин хIакьинугу хIадурну бушиву, Ватандалухсса ччаву хьхьичIунну яхъанайгу, къуццу тIийгу бушиву, Хъун дяъвилул вирттаврал наслугу тайннаха лавхьхьусса бушиву. Къабагьаннав щинчIаввагу уттиния тинмай Ватан дуручлан!
