Цаппара гьантрал хьхьичI ва гьуртту хьуссия Москавлив ПаччахIлугърал Советрал заседаниялий. Ва дайдишин хьхьичI Щалагу Аьрасатнал «СсихIирданул елкалия» бучIан бувну бур оьрчIал хияллащалсса цаппара шарду. Миннувух бартбивгьуну бур Запорожскаллал областьраясса Плодородное шяравасса 7 шинавусса Кристина Пучковал мурадгу.
ХIакьину тIурча, чIавасса 6 хиялчинал ларсунни региондалул бакIчинаясса цала бахшишру.
Миннавух бур 15 шинавусса Ирада Ханова – «Растущие надежды» номинациялий Дунияллул халкьуннал дянивсса «Филантроп» премиялул лауреат, «Шаг навстречу» ва «Ангел и я» тIисса щалагу Дунияллул творчествалул фестивальданий ххув хьумур, «Имена России» тIисса Дунияллул халкьуннал дянивсса фестивальданул 1-мур даражалул лауреат, «Движение Первых» тIисса щалагу Аьрасатнал ва регионал проектирдал гьурттучи. Мунин Сергей Меликовлул дуллунни акустикалул система – музыкалул колонка ва микрофон. Душнил, микку балайгу куну, республикалул бакIчинан буллунни, хъун бакъасса, цила канил бувсса ссайгъат.
Ххунзахъиял райондалиясса 7 шинавусса Индухова Залмун дуллунни смарт-ссят. Ванил ххассал увссар, микI гъавгъун, микIиралу ливчIсса оьрчI.
Бахшиш дуллунни ххассал увсса Пирбудагъ Жамалуттиновлунгу. Мунангу, хасъсса дяъвилул операциялул гьурттучинал арс Камал СалихIовлунгу дуллунни аькьлу бусса колонка «Алиса».
Сергей Меликовлул бартбивгьунни 6 шинавусса ХIамза Аьлиевлул мурадгу, ванал хиял бия шведская стенка. Му бучIан бантIий бур шаппайн. Даниял Дандамаевлул мурадгу бартлавгунни, ва щяивкIунни цанна дуллусса цIусса велосипедрай.
«Барчаллагь укун виричусса, сивсусса, пагьму-гьунар бусса, хъинсса ва аькьлу бусса оьрчIру тарбия буллалисса циняв ниттихъан ва буттахъан. Вингу барчаллагь, Дякъил Ттаттай ва Марххала душ: зул дур къабигьасса даву – оьрчIру барча баву. Жула оьрчIру барча баву ххарисса ишри, цанчирча вай яла ххаллилмири!» – увкунни Сергей Меликовлул.