Апрельданул 14-нний Дагъусттаннал бакIчинал аьчухсса ихтилатрал форматрай жавабру дуллунни журналистътурал, блогертурал ва жяматрал чулухасса вакилтурал суаллахьхьун. Хьунабакьаврий ххал бигьлай бия тIабиаьтрал апатIрал биян бувсса зараллу бухлаган баврил, инсантуран кумаг баврил ва цаймигу масъалартту.
КIицI лаглагисса масъаларттавасса цалчинмур бия КIачIухуллал (Геджух) платина личин даврил хIакъиравумур.
«Ва бакъар къуллугърайминнал дурмур ягу къадурмур кьюлтI дансса хIарачат. Ва дур буниялагу ляличIисса тагьар: чявхъа-гъараллал лагру дия КIачIухуллал плотина щинахьхьун гьаншиврийн нигьачIаву диян дуллалисса, ва дур тIабиаьтрал апатIрал хьун дурсса тагьар. Муксса хъуннасса щинал лагру бартхьхьиривун ларгун яла плотина личин даврил ци чулийгу хIасул дантIиссия авариялул тагьар», – увкунни Сергей Меликовлул.
Му мукуннугу, региондалул бакIчинал сипталийну ххал диргьуссар плотина лирчусса зоналийсса гидротехникалул сооруженияртту ва Аьрасатнал Федерациялул силисталул комитетрал дачин дурссар уголов дело. ЦIанасса ппурттуву ххал дигьлай бур цаппара къуллугъчитурал давуртту.
«Агана жу, масалдаран, ва информациялущал кIул хьуну бивкIссания щинахьхьун гьаннин 2-3 гьантлул хьхьичIва, бюхъайва цукунсса дунугу давуртту ялагу дан хьунгу. Амма тагьар даххана хъанай дия анаварну, щин лахъ хьуна цаппара ссятирдал мутталий», – увкунни республикалул каялувчинал.
Региондалул бакIчинал бусаврийну, ччясса мутталий дуван аьркинмур дурну диркIссар: щинахьхьун ларгсса зоналия цIан лакьланнинма бизан бувссар инсантал;
дурссар режимрал мероприятияртту, нигьачIаву дусса зоналий инсантал къаличIаншиврул;
дузал дурну диркIссар ххассалбувулт ва волонтертал зунсса шартIру, ми анаварсса мутталий хIадур бувну бивкIссар ва бивчуссар Дарбантуллал райондалийн МахIачкъалалия ва Хасавюртуллал райондалия.
Хьунабакьаврий Сергей Меликовлул бувсунни зараллу бивминнан багьайсса кумагру баврия ва инсантуран цалчинми выплатартту дулаврия.
Сергей Меликовлул бувсунни мукунма щинал объектру мюхчан баврил давурттаягу, зунттал районнайсса тагьарданиягу, «Приморская» подстанциялул ва аьмну энергокомлексрал хIакъиравугу.
