Июльданул 1-нний Дагъусттаннал бакIчи Сергей Меликов хьунаавкьунни граждан обществалул идарарттал вакилтуращал. Мероприятие хас дурну дия июньдалул 23-нний хьусса трагедиялул иширттан кьимат бищаврин ва региондалий экстремизмалул ва терроризмалул иширттал профилактикалунсса чаранну лякъаврин.

Региондалул бакIчинал був­суна терактирдал мурад бивкIшиву региондалий, традициялийсса исламрал ххазинардугу оькки бувну, хIусутшиву ва ццах бутаву, тагьар оьлукъин даву.
– Жунма хъинну дакIнийссар 90-ку шиннардий хьусса ишру, та чIумал жущава цачIу бювхъуссия паччахIлугърал цашиву ва суверенитет лиян дуван кьаст лархIуну диркIсса дунияллул халкьуннал дянивсса бандформированиярттал кьюкьрал хьхьичIалу кьукьин. Та чIумал бандитътурайн къарши бувккун бивкIссар ихтиярду дуруччай органнащал архIал укунмасса инсанталгу, ярагъгу кIунттихьну. Мунил дирхьуссар террористътуран ахир. Цанчирча агьалинал бияла даиман ярагъуннияргу гужссар, – куна региондалул каялувчинал.
Сергей Меликовлул тIиму­нийну, га кьини хьусса оьттул питна хъанахъиссар Дагъусттаннал диннал ва миллатирттал вакилтурал дянивсса уссушиврийсса дусшиврийхсса рищаву. Дагъусттаннал жямат кIибищун бувансса хIарачат тачIав мурадрайн къабувкссар.
– Жува аьркинссар личIлулну бикIан, цанчирчан питнардайн гьуз буллай бур гьарца шаттирахун. БувчIин аьркинссар, душмантурал мурадру ци буссарив, къалпсса диннал лозунгиртталу кьюлтIгу хьуну. ХьхьичIва террорданул актру хъунмурчIин бандитшиврул журалийсса бивкIхьурча, хIакьину ришлай бур диннал дянивсса аслахIшивруйх. Терроризмалул ва экстремизмалул цукунчIавсса ара дакъассар исламращал ва цаймигу диннащал. Му хIакьсса питнар, – куна региондалул бакIчинал.
Сергей Меликовлул тапшур бувна терроризмалийн къаршисса мероприятияртту формалунсса къадуллан. Республикалул бакIчинал тIимунийну, мукунсса иширттал хIакъиравусса батIавуртту «галочкалунсса» дикIан къабучIиссар. ХIа­кьинусса мероприятиялул хIасил хьун аьркинссар балжисса выводру.
Сергей Меликовлул бувсуна, та кьини ливтIусса ихтиярду дуруччай органнал зузалт бикIан аьркиншиву хасъсса дяъвилул операциялул вирттавращал ца кьюкьлуву.
Республикалул каялувчинал пикрилий, миллатирттал дянив ссивцIу бичаврил ва мунил гьанулий преступленияртту даврил ттизаманнул ярагъруну хъанай бур экстремистътурал интернет ва социал сетьру ишла дуллалаву – сообществарду, пабликру ва группарду, миннувух кьатIаллил билаятирттал куратортурал каялувшивриймигу. Миккун дичлай бур властьрал органнал давуртту, диннал идарарттал дуллалимур оьккиккаккул дуллалисса тезисру, оьвчавуртту дуллай бур ихтияр дакъана акциярду буллалияра тIий.
Миккува региондалул бакI­чинал журналистътурайн ва блогертурайн тапшур бувна инсантурачIан биян буллан так ххал бувсса, хъирив лавсса информация.
Яла махъ лавхъуна Да­гъусттаннал бусурманнал рувхIа­нийсса лидер АхIмад- Апанди Аьбдуллаевлул. Ванал тапшур бувна исламрал террористътурайн преступниктал къаучаван.
Республикалул муфтий лаивзуна дагъусттанлувтурайн, миннал лагма хъанахъисса иширттах баччи бакъа къабуруглан. Ванал тIимунийну, мукунсса баччи бакъашиврийну цила чIумал ппив хьуну дия вахIабизм. АхIмад- Апанди Аьбдуллаевлул ялагу ххи бувна, терроризмалул иширттахгу бурувгун бикIан аьркиншиву, хIатта микку мачча-гъансса ягу чIаххул хIала-гьурттуну бухьурчагума.
Хьунабакьаврий ихтилатру бувна цаймигу гьурттучитурал.

ХIадур бувссар ХI.Аьдиловлул