Ххал бигьлагьисса масъаларттавух бия властьрал органнал инсантурал лабизавурттах къулагъас дуллалаву, цIуллушиву дуруччаврил аралуву коррупциялийн къарши буккаврийн ялун ххи бувсса чаранну, «Национальная система пространственных данных» госпрограмма бартдигьаву.

Июльданул 3-нний ДР-лул бакIчи Сергей Меликовлул дунни агьамсса масъаларттал хIакъиравусса батIаву.

ДР-лул БакIчинал ва ХIу­куматрал Администрациялул каялувчинал чIумуйнусса кIа­найма МахIач Оьмаровлул бувсуна июнь зуруй инсантурая дуркIсса лабизавурттал хIакъираву. Дагъусттаннал ЦУР-данул сияхIрайн ларсун дур 8,4 азарда лабизаву. Исполнитель властьрал органнайн тIайла дурккун дур 3170 лабизаву, муниципалитетирттайн – 3235, ресурсоснабжениялул идарарттайн – 2052.
Миннува чIяруми лабизавуртту дур электроснабжениялул хIакъиравусса. Бур масъалартту дяркъусса щин къадулаврил ва цIинцI цила чIумал дукьан къадуллалаврил хIакъиравусса ва цаймигу.
Цаппара лабизавуртту дур июльданул 1-нния шийннай МахIачкъалаллал маршруткар­дахсса багьри 32 къурушрайн биянцIа лахъ баврил хIакъи­раву.
Миннал тIимунийну, багьри лахъ баврил сававрду хъанай дур маршруткардал луртан бутIри ххира шаву ва зузалт лихълахъаву, миннан харжру лахъ бан багьлай бушиву.
– Зу зула бизнес дачин дурсса чIумал, доходравасса арцу махъ дишин аьркинссар, машиналул ца луртан бутIа (запчасть) гъагъарча, ганин кIанай цамур, лавсун, бишин бюхъаншиврул. Агьалиная тIалав дуллан къааьркинссар. Луртан бутIа гъагъарча маршруткалух багьа лахъ буван аьркинссарив? Му къатIайласса ххуллур. Москавлив 10 шинал мутталий багьри лахъ бувну бакъар, мукунма Санкт- Петербургливгу, цаймигу хъунисса шагьрурдайгу. Багьри лахъ буллай бур так МахIачкъалалив, – кунни Сергей Меликовлул. Ванал шагьрурдал бакIчитурайн тапшур бувна ва масъалалул хIакъираву цала чулий кьянкьану бацIан.
Сергей Меликовлул бувсуна, жяматийсса транспорт­рал тагьар ттизаманнул тIалав­шиннардацIун даркьусса дакъашиву.
Региондалул бакIчинал дакI­нин бувтуна, ва масъала бартбигьиншиврул республикалий зий бушиву 2030 шинайннинсса ДР-лул жяматийсса транспортрал лябуккулул программалуха. Ва цукун бартдигьлай буссарив бувсуна транспортрал министр Жамбулат Салавовлул. Ванал тIимунийну, МахIачкъалалун хасну ттинин лавсун бур цIусса ттизаманнул 47 автобус. Уттигу ласунтIий бур 61 автобус.
БатIаврий ххал бивгьуна цаймигу масъалартту.