![](https://ilchi.info/wp-content/uploads/2020/05/1f1cb28f-a079-470e-a24d-96f641cd11b1-225x300.jpg)
Онлайн-байрандалий махъра-махъсса занг ришлай.
[dropcap]Ч[/dropcap]Iяру хьунни жула оьрмулуву махIрумшивуртту. МахIрум бунни Аьрасатнал агьалинан яла ххирамур байранну хъанахъисса Ххувшаврил байран цила аьдатсса даражалий даврия.
МахIрум бунну бусурман агьулданун ца яла хьхьичIунсса Зумаритавал байрандалия. МахIрум бунни школа къуртал буллалими оьрмулуву ца яла ххариссакьинилия – Махъра-махъсса занглил байрандалия. Дунияллийн цамур оьрму бувкIунни, цимурца дуцин багьунни онлайн-кьаралданийн.
Зулайхат Тахакьаева
Сий дуну, лайкьсса даражалий дайссия Гъумучиял школалий Махъра-махъсса занглил шадшиву. Ванил дуссия шиннардий цIакь хьусса аьдатру.
Школалул тарбиялул ва сакиншиндарал даврилсса буллалисса завуч Зухра Кьурбановал хъунмасса захIмат бивхьунни Махъра-махъсса занглил байран онлайн-кьаралданийгу лайкьсса даражалий дан, школалул аьдатрай яргну ва дакIний личIанну. Ванил бусласимунийн бувну, гьашину Гъумучиял школалий хъанай бур 81-сса выпуск. Школа къуртал бувну бур 15 оьрчIал, миннава онлайн-байрандалий гьуртту хьуну ур 13.
Гьуртту хьунни байрандалий Лакрал райондалул бакIчи Юсуп МахIаммадовгу. Онлайн-кьаралданий ванал бунни райондалул учительтурахь барчаллагь тIисса, школа къуртал буллалиминнахь ххуллухъин тIисса ихтилат.
— Махъсса кIива зурул мутталий зу бияв самоизоляциялул шартIирдай зий. ЧIярусса захIматшивуртту хьунадаркьунни зун къавардишсса шартIирдай зун. Гьарца дуклаки оьрчIал дакъая дистанциялий дарс лахьлансса шартIру. Бюхъайсса хIарачат жугу барду, чIявусса кулпатру бусса, ахIвал кIюласса кулпатру чIумуйнусса дузал барду компьютердал, — увкунни Юсуп МахIаммадовлул.
Ванал бувсунни цIусса дуккаврил шинайн къапурду тIитIинтIий бушиву Гъумучиял цIусса школалул. Капитальнайну бакьин бантIий бушиву мяйва школа: ГьунчIукьатIрал, Кумиял, Хьурттал, Хъунайннал, КIундиннал, Карашрал, Уриннал, Щардал. Щардал школалул гьанулий тIитIинтIий бушиву «Точка роста» тIисса кIулшиву дулаврил центр.
Гъумук буллай байбишинтIий бушиву 120 оьрчIансса детсад.
КIицI лавгунни бувну къуртал бувшиву Гъумучату Ххюлусмавсса ххуллу, проектрал сметалул давурттугу къуртал дурну, чIал къавхьуну байбишинтIий бушиву газ буцлай. Мукунна къуртал хьуну дусса дур кIива щинаххуллу буцинсса проектрал-сметалул давурттугу.
— Вай цинярдагу давуртту дуллалиссар жагьилсса ник райондалийннай зана даншиврул, буттал улча хьхьичIунмай бансса миннал сиптардацIун кабакьу булланшиврул. Хъамамабитару зува, чувнияргу, буттал ватандалий аьркинну бушиву, — увкунни Юсуп МахIаммадовлул, школа къуртал буллалиминнахь ххуллухъин тIий.
Школа къуртал буллалими балайрдайну, шеърирдайну барчаллагь тIий бия школалухь, учительтурахь, буттал кIанттухь.
Мюрщими классирттал дуклаки оьрчIалгу бувккунни школа къуртал буллалиминнахь барчаллагь тIисса шеърирду.