УнцIукIуллал райондалийсса Ахульго зунттуй хьунни 12 азарунниха ливчусса инсантал бавтIсса, «Ахульго — вершина знаний» тIисса Республикалул мажлис.

Ванил сиптачитал бия Да­гъусттаннал гуманитар институт ва УнцIукIуллал райондалул администрация. Динчи-аьлимчув Идрис Асадуллаевлул чIурчIав дуруна жагьилтурал дянив наркомания ппив хъанай душиврий, чара бакъа оьрчIругу, жагьилталгу ва балаллуя буруччинсса чаран лякъин багьлай бушиврий. Республикалул Муфтиятрал просвещениялул отделданул зузала МухIаммадрасул Гимбатовлул кIицI лавгуна, диндалул кIулшивуртту куртIсса, цIакьсса духьурча, жагьилтал бяйкьу ххуллийн къабагьантIишиву. Муф­тинал хъиривчу Аьбдулла Салимовлул бувсуна махъ ппурттуву республикалий хьусса иширттая, Муфтиятрал даврий аьй-бювкьурду дуллалисса кIану бушиврия, даву дащуй дишинми мудангу бикIайшиврия, амма куннащал кув бавкьуну, цалийн къабувкIсса кIану бухьурчагу, дакIру ца дурну, махъгу ца бувну къуццу тIун аьркиншиву. Республикалий мудангу, динну ва миллатру личIи къабуллай, хъуниминнал хIурмат буну, Муфтиятрал дуллалимунивух гьурттуну, исламрал ххуллу-хха бурувччуну занакьулу хъанай бивкIшиврий, уттигу мува ххуллийх бачиншиврий чIурчIав дуллалисса ихтилатру бувна ДГИ-рал ректор НухIкьади БахIмудкьадиевлул, УнцIукIуллал райондалул хъунама Ися НурмахIаммадовлул ва махъ нанисса цаймигу аьлим­турал.
Мажлис къуртал хьуна умралийнсса путевкарттал кIуну бу­ккаврийну, 3 инсан мубараксса аьрщарайн хIаж бувансса путевкарттал заллухъру хьуна.
ПатIимат Рамазанова