Ниттил увну 85 шин шаврищал, чIа тIий ура вин ккавкказуллал цIуллушиву, дагъусттаннал оьрмулул лахъишиву, давриву хьхьичIуннайшиву, кулпатраву талихI!
Яраппий, я Аллагь, вин 95 шин дуллалисса кьини дучIаннав! Лакрал тарихгу, мазгу цIакьну ябуллалисса шаэртуралгу, чичултралгу чIирисса дастталул бакIчигу, ниттил мазрал «символика» ядаймагу ина ура, вихьхьун цIуллушиву дулуннав! Вайннул ца барашинна дуллай дур, танива на лавхьхьуну, уттигу дакIнийнувасса, вил «Лакку чIу» тIисса назмулул:

Зизлай бур дакIнил чIурду
ттул ялун вил мазрая,
Зизайсса кунна интту
багъравун тIутIал гъарал,
КьатIув марххала буна,
инт дайдихьлахьиссарив?
ЛухIи тIутIул чIапIава
булбул балай тIиссарив?

Чагурданул синттурив
ттул къюкI хъазамравусса,
Вил чIугу тазанакрив,
ми зурзу тIутIи дурсса
КъакIулссия лакку маз
ваксса нацIусса бивкIсса,
ДакIнивусса пикригу,
дардгу бусан бюхъайсса.

Уча, душ, балай уча
ччавриха, хъиншивруха,
Дунияллийх леххувча
лаккудушнил лакку чIу!

Ва балай бучIия магьирлугърал идарарттал репертуарданул вирдакIну хьун, балайчитурангу щаллу буллан.
Вил кьинилун хас буллай ура вай ххаругу:

Ниттил накIлил увччусса,
Лакрал зунттав хъун хьусса,
Мухлукьатрал патриот,
Зумув пасихI маз бусса.

Шанан акъа кIараллий
ТакIуй бакI къадишивуй,
Вил ххаллилсса оьрмулун
Так тирхханну ккаккивуй!

Ина саннарду дара
Аьрай шагьид хьунаха,
Къуману ливчIуминнал
ДакIру рахIат дувансса.

Дулуннав вихьхьун кьудрат
Лакку маз ахттар буллан,
Дулуннав каши Заннал
Лакрал халкь ххари буллан.

МахIмуд Аьлилов,
ш. СунбатIул