Сентябрьданул 22-нний Каспийскалий Дагъусттаннал премьер МахIаммад Рамазанов гьурттуну тIивтIунни газобетондалул блокру, кираж ( извёстка) ва цаймигу строительствалул аьркинмур итадакьлантIисса «Ровна» тIисса заводрал комплекс.

Ва заводрал республикалул промышленность чIаланну гьаз дувантIий дур, аьркинмур цайми регионная дучIан къадуллай, жучIара машан ласлай.
Инвесторнал 1,7 миллиард харж бувну бур ва предприятиялун, хIакьинусса кьини 125 инсан зий усса ур. Заводрал вакилтурал бувсмунийн бувну, уттигу зузалт ххибантIий бур, чIал къавхьуну вайннал аьдад 200 лахъантIиссар тIий бур. Бувсунни вайннал гьантлун 200 тонна известкалул итадакьлантIишиву, бетон – 360 азарда кубический метра шинай ва строительствалунсса кьавкьсса смесирттал 80 азарда тонна шинал.
«Застройщиктураща утти бюхъантIиссар шиккура итадаркьусса стройматериаллу чIумуй машан ласлан, укунсса сантирал социал объектру, школарду, поликлиникарду ва агьалинансса къатри дуваврил бущигу дири буккан бантIиссар», – увкунни ванал.
Ва завод бувсса компаниялул ца учредитель МахIаммадаьли БахIандовлул бувсунни ххюра шинай хъинну ялув бавцIуну зий бивкIшиву завод буллай, строительство цурдагу экономикалул локомотив духьувкун, республикалул экономика хьхьичIуннай хъит учин дуваврил ххуллийсса даву душиву. Цама учредитель Руслан Жамалуттиновлулгу кIицI лавгунни, заводрая буниялттунгу хайр бикIантIишиву бизнесрал заллухъруннан бакъа, щала Дагъусттаннангу.
ХIукуматрал хъунаманал кIицI лавгунни, Дагъусттаннал промышленность сантирай ва лябуккулий хьхьичIуннай хъанай душиву, республикалул экономикалун ва хъинну агьамсса хьхьичIуннайшиву душиву.
Ва заводрая махъ премьер ивунни республикалул цаймигу предприятиярттайн, вайннувух «Экотар» тIисса заводрайн.
Ивунни Каспийскаллал Стекловолокнорал заводрайнгу. Ва заводрал нанисса шинал цалчинмур кварталданий 10 миллион налогирттал буллуну бур ва 262 инсан давурттал щаллу увну ур. Вава бюхъулий Дагъусттаннал промышленностьрал флагманну хъанахъисса МахIаммад ХIажиевлул цIанийсса заводгу зий бушиврий чIурчIав дунни МахIаммад Рамазановлул.
ПатIимат Рамазанова